𝗠𝗶𝗻𝗶𝘀𝘁𝗲𝗿 𝗫𝗶𝗼𝗺𝗮𝗿𝗮 𝗠𝗮𝗱𝘂𝗿𝗼 𝗵𝘂𝗻𝘁𝗼 𝗰𝘂 𝗠𝗶𝗻𝗶𝘀𝘁𝗲𝗿 𝗣𝗿𝗲𝘀𝗶𝗱𝗲𝗻𝘁 𝗘𝘃𝗲𝗹𝘆𝗻 𝗪𝗲𝘃𝗲𝗿-𝗖𝗿𝗼𝗲𝘀 𝗮 𝗿𝗲𝘂𝗻𝗶 𝗰𝘂 𝗗𝗶𝗿𝗲𝗰𝘁𝗼𝗿 𝗚𝗲𝗻𝗲𝗿𝗮𝗹 𝗱𝗶 𝗔𝘀𝘂𝗻𝘁𝗼 𝗜𝗻𝘁𝗲𝗿𝗶𝗼𝗿 𝘆 𝗥𝗲𝗹𝗮𝗰𝗶𝗼𝗻 𝗱𝗲𝗻 𝗥𝗲𝗶𝗻𝗼 𝗥𝗼𝗮𝗹𝗱 𝗟𝗮𝗽𝗲𝗿𝗿𝗲

Recientemente Minister Xiomara Maduro hunto cu Prome Minister Evelyn Wever-Croes a reuni cu Director General di Asunto Interior y Relacion den Reino sr. Roald Laperre. Sr. Laperre hunto cu un delegacion a haci un bishita di trabou na Aruba pa trata e topico di conmemoracion di abolicion di sclavitud den Reino. Hulanda kier duna mas contenido na locual Premier Rutte a expresa den su discurso ora cu den nomber di Gobierno Hulandes ela ofrece disculpa pa e pasado di sclavitud den Reino Hulandes. A indica cu e excusa ta un komma y no un punto final.

Sr. Laperre a bishita e islanan Aruba, Boneiro y Corsou pa haya un bista di e trabounan cu ta wordo haci relaciona cu e conmemoracion di e 160 aña di abolicion di sclavitud den Reino Hulandes dia 1 di juli 2023. Alabes pa traha hunto cu e islanan riba locual Hulanda a palabra caba cu lo financia na cada isla. Pa Aruba a bay de acuerdo pa laga traha e estatua di e catibo Virginia como cara di sclavitud na Aruba, e imprenta y traduccion di e buki ‘Slaven zonder Plantage’ como material educativo pa scolnan y sigui financia e digitalisacion di documentacion colonial na Archivo Nacional Aruba.

Durante e reunion Minister Xiomara Maduro a brinda un splicacion tocante e trabounan cu ta wordo haci pa conscientisa comunidad riba e topico di sclavitud na Aruba. A traha un programa educativo riba sclavitud na Aruba. A tene encuentronan informativo pa por haya ideanan pa por traha un agenda di actividad prome y durante e aña cu ta conmemora e 160 aña di abolicion di sclavitud den Reino Hulandes. Tambe a tene tayer y curso pa prepara interesadonan cu kier aplica pa fondonan Hulandes pa nan proyecto cu tin di haber cu sclavitud. Alabes e mandatario a amplia riba e preparacionnan pa pronto sigui brinda mas informacion na nos comunidad tocante e historia di sclavitud na Aruba via programa informativo.

Minister di Cultura a gradici sr. Laperre y e delegacion Hulandes pa nan interes y bishita na Aruba. E delegacion a keda impresiona pa mira cuanto trabou ta wordo haci pa Aruba su comunidad por wordo bon informa riba e topico di sclavitud na Aruba, cu ta un parti menos bunita di nos historia comparti den Reino Hulandes.