SOAW a kuminsá drecha entre 90 pa 100 kas den estado deplorabel.

Willemstad – Riba enkargo di Ministerio di Desaroyo Sosial, Labor i Bienestar (SOAW), Reda Sosial a kuminsá drecha diferente kas rònt Kòrsou, ku ta den mal estado. Segun un lista di SOAW di suidadanonan ku a hasi un petishon via Fundashon Dun’é Un Chèns, Reda Sosial i Fundashon Banda Ariba, lo bai atendé entre 90 pa 100 kas di famia den mal estado, durante e periodo ku ta sigui.

Minister Larmonie-Cecilia di SOAW i Reda Sosial a bishita algun di e kasnan ku lo bai drecha pa tuma nota di e situashon aktual den kuá e famianan ta biba.

E siman aki ta kuminsá ku e promé 20 kasnan. Ku e projekto akí SOAW lo aliviá varios famia, den hopi kaso kaminda tin mucha, di situashonnan di bibienda i ambiente ku no ta salú pa hende biba. Hopi biaha ta trata di hendenan ku ta den ònderstand, sinembargo e projekto no ta dirigí solamente riba hendenan ku ta kobra onderstand, sinó tur ku esnan ku a mèldu nan situashon di bibienda serka SOAW.

E trabounan ta varia for di reparashonnan chikí te esnan mas grandi kaminda mester kambia dak di kas o traha un kamber chikitu pa muchanan ku tin den e kasnan. Huntu ku e projekto di reparashon di bibienda, SOAW lo sòru tambe pa guia personal di e habitantenan.

Ta spera ku den algun siman ya por kuminsá mira resultado di algun dje trabounan di reparashon ku a start di manera ku e famianan por tin un bida mas digno.