Promé Minister Gilmar Pisas TA SIGUI DUNA MAS INFORMASHON RIBA E PROSESO PA HABRI FRONTERA.
Willemstad – Promé Minister sr. Gilmar Pisas ta sigui duna mas informashon i un resúmen riba e proseso pa habri frontera entre Venezuela i Kòrsou.
Dia 31 di yanüari 2023 a tene e di tres konsulta tékniko entre Venezuela i e islanan den Reino i Hulanda (Aruba, Boneiru i Kòrsou =ABC).
Despues di e reunion aki Gobièrnu di Kòrsou a tuma desishon, durante di e reunion di Konseho di Minister dia 8 di febrüari 2023, pa proponé Venezuela un fecha pa habri frontera entre Venezuela i Kòrsou.
E fecha ku a proponé tabata 3 di aprel 2023.
Di parti di Embahada di Reino na Caracas, a manda un “Nota Verbale” (dokumento ofisial diplomátiko) den kual a informá Venezuela di e desishonnan ku kada isla den Reino a tuma relashoná ku e posibel fechanan pa ku reapertura gradualmente di frontera marítimo i aéreo, e prosidementu i kondishonnan ku tin di tene kuenta kuné.
Pues tur e informashonnan aki a keda mandá pa e outoridatnan kompetente na Venezuela dia 23 di febrüari 2023.
Dia 2 di mart 2023 Venezuela a manda un “Nota Verbale” komo kontestá riba e “Nota Verbale” ku nan a risibí di parti di Reino dia 23 di febrüari 2023, den kual a informá e islanan ABC ku di parti INEA (Instituto Nashonal de Espacios Acuaticos) ke inisiá e reunionnan pa por kumpli ku tur e detayenan tékniko pa ku e parti marítimo.
A sigui ku diferente reunion entre e grupo di téknikonan i e agensia ku ta atendé ku e boto i barkunan na Venezuela.
Promé Minister sr. Gilmar Pisas ya a kompartí tur e informashonnan aki ku nos komunidat den e komunikadonan fechá dia 1 di febrüari 2023, 9 di febrüari 2023 i 4 di mart 2023.
E fecha ku Gobièrnu a proponé na Venezuela tabata dia 3 di aprel pa e reapertura gradualmente di e parti marítimo i aéreo.
Outoridatnan Venezolano i esnan di Kòrsou a bini ta traha hopi duru huntu pa kumpli ku e fecha aki pa nos por risibí e promé barquito i barkunan for di Venezuela. E proseso aki ta muchu mas difísil ku e parti aéreo i ta tuma su tempu. Esaki ta pone ku tin algun sirkumstansia ku ta for di nos alkanse i ku ta impedí e yegada di e barquito i barkunan dia 3 di aprel próksimo. Ya a komprondé si kaba ku e barkunan mas grandi (Groothandel) lo por kuminsá yega despues di dia 15 di aprel 2023.
Djamars awor lo sigui ku e reunionnan ku Venezuela pa por fiha e fecha eksakto, mas pronto ku ta posibel, pa ku e yegada di e barquitonan na Kòrsou.
Ta habri e espasio áreo si bèk entre Kòrsou i Venezuela entrante 3 di aprel 2023. Lo habri bèk den 3 fase:
- 3 di aprel: ta habri esaki pa buelonan estilo ‘charter’, esta buelonan riba petishon di un òf mas kliente spesífiko, pero no regular,
- 1 di mei lo habri esaki pa aviashon general (aviashon chikitu),
- 1 di yüli pa servisionan reglá.
Esaki ta resultado di interkambio entre Kòrsou su Outoridat di Aviashon Sivil i su ‘counterpart’ na Venezuela, esta ‘Instituto Nacional de Aeronáutica Civil’ (INAC).
E habrimentu di frontera gradualmente aki mester garantisá un komienso di tráfiko den un forma ordená. Kórsou tin intenshon pa kaba di negoshá un tratado aéro nobo (Air Services Agreement) aki 6 luna.
Di parti di Gobièrnu di Kòrsou lo sigui mantené kontakto ku tur esnan enbolbí na Venezuela i alabes sigui duna informashon riba e proseso aki na nos komunidat.
