DELEGASHON GUBERNAMENTAL TA ATENDÉ DIFERENTE ASUNTU INFRASTRUKTURAL NA HULANDA

Willemstad – Resientemente, un delegashon gubernamental a hasi un biahe di trabou pa Hulanda ku e meta pa atendé diferente asuntu riba e tereno di infrastruktura. E delegashon aki a konsistí di: Sekretario General di Ministerio di Tráfiko, Transporte i Planifikashon Urbano (VVRP) Sr. ir Dwigno Puriel, Direktor di Sektor di Infrastruktura i Planifikashon Urbano, Sra ir C. Manuel, i Hefe di Kabinete di Minister Charles Cooper, Sra. mr. I. Pikerie. Minister Plenipotensario Sr. C. Manuel tabata presente na e diferente enkuentronan.

 

Programa pa Mantenshon di Kaminda 2023-2029:

E delegashon a hasi un bishita di trabou na Rijkswaterstaat i na Ministerio di Infrastruktura i Awa (I&M) di Hulanda. Kòrsou a presentá su Programa pa Mantenshon di Kaminda di 2023-2029, i a indiká riba kua tereno lo mester di asistensia, konseho i/òf ayudo di Ministerio di I&M, Rijkswaterstaat, Gemeente Leiden, Gemeente Rotterdam, i Gemeente Amsterdam. Esaki mirando e trabounan grandi infrastruktural ku últimamente ta tumando lugá na Hulanda. A palabrá ku di un forma bilateral i struktural, VVRP lo aserká tur partido menshoná pa asistensia.

 

Tambe, e delegashon a risibí un presentashon ekstenso kon Hulanda ta trahando riba su maneho di awa, lokual tambe ta aspektonan ku Kòrsou por siña den dje pa loke ta fortifikashon di nos kosta, i kambio di klima.

 

Bestür Stichting Werelderfgoed:

E delegashon a partisipá na un reunion di Bestür di Stichting Werelderfgoed na Hulanda. Durante di e reunion aki, a interkambiá tokante:

– balor di edifisionan monumental,

– apuntashon di algun edifisio nobo inkluo e retonan ku esaki ta trese kun’e,

– introdukshon di konsientisashon pa loke ta monumentonan den e kurrikulo eskolar, i

– maneranan pa duna mas atenshon speshal na Kòrsou su status riba lista di Patrimonio Mundial di UNESCO ya pa 25 aña, i e moneda speshal ku a saká pa e fecha di konmemorashon.

 

E delegashon a hasi un invitashon na Stichting Werelerfgoed pa konsiderá e posibilidat pa tene un reunion di su bestür e aña aki na Kòrsou.

 

Rekorido terenonan di Schiphol:

E delegashon, huntu ku Minister Plenipotensario Manuel, a hasi un rekorido di terenonan di aeropuerto Schiphol na Amsterdam. Meta di esaki tabata pa analisá kua ta e diferensia ta entre di terenonan di aeropuerto i terenonan rondó di e aeropuerto. Tambe a interkambiá kon por desaroyá e terenonan infrastrukturalmente rondó di aeropuerto na Kòrsou pa krea un impulso nobo teniendo kuenta ku e plan di Curacao Airport Holding (CAH) alreador di aeropuerto Hato.

 

Global Forum of Cyber Expertise:

Durante di e biahe di trabou, e delegashon a reuní ku Global Forum of Cyber Expertise (GFCE). Manera ta konosí, Kòrsou a bira miembro di GFCE resientemente, i a nombrá diferente punto di kontakto pa traha den e gruponan di trabou di GFCE. E puntonan di kontakto ta:

– Strategiko Sibernétiko, Sr. Ir. Dwigno Puriel,

– Responde riba insidentenan sibernétiko, ir drs. Elgeline Martis,

– Krimen Sibernétiko, Sr. Gilberto Rodriguez, i

– Kultura i Abilidatnan, mr. Islelly Pikerie, huntu ku Jhanirha da Costa Gomez-Anita MSc.

 

A palabrá kon ta bai pone kada grupo di trabou kuminsá funshoná, i ku komunikashon lo ta un aspekto ku tur grupo mester ku tene kuenta kun’e. Tambe a evaluá e nesesidat di un grupo di trabou apart pa atendé ku komunikashon i maneho di kambio. Banda di esaki, a evaluá tambe pa lanta un grupo di trabou pa atendé ku diplomasia sibernétiko, ku awor mas i mas ta birando relevante.

 

Finalmente, a interkambiá tokante e posibilidatnan di traspaso di konosementu, training,  Kongreso di RSA benidero, i LAC4.