Petishon pa reunion di komishon sentral tokante posibilidatnan pa krea empleo i entrada a korto plaso ku Refineria di Kòrsou.
Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Willemstad, 27 mart 2023
Tópiko: Petishon pa reunion di komishon sentral tokante posibilidatnan pa krea empleo i entrada a korto plaso ku Refineria di Kòrsou.
Apresiabel Sra. America-Francisca,
Manera ta konosí, durante e reunion Públiko di 16 di januari 2023, ku a keda reanudá dia 3 di febrüari 2023, Minister President Pisas a informa Parlamento, ku el a duna instrukshon na e kompanianan anonimo di gobièrnu, Refineria di Korsou N.V. (RdK) i Curoil N.V. (Curoil) pa (den palabranan di Minister President) kuminsa “hasi negoshi” ku e Refineria “mas pronto posibel”.
Suskritonan ta kompronde for di e ekspreshon aki, ku tanten RdK ta bezig ku e di 6 proseso pa yega na un operadó pa Refineria, Minister Pisas ta pensando pa mas pronto posibel (a korto plaso) usa e Refineria òf e tereno ku ta pertenesé na RdK pa varios tipo di negoshi ku lo generá entrada i empleo pa komunidat di Kòrsou i e mas ku 2000 personanan ku a inskribí for di mei 2022 pa traha na Refineria i te ainda ta wardando.
Suskritonan ta sostené e pensamentu aki kompletamente i ta dispuesto na sostené akshonnan konkreto den e kuadro aki. Realidat ta, ku historia ta siña nos ku kualke proseso pa yega na un operadó pa Refineria, asta unu aselerá, lo tuma su tempu pa finalisá i komo tal ta sumamente importante pa na e mesun momentu ku ta bezig ku e trayekto aki, inisiá trayektonan paralelo a korto plaso ku por generá entrada i empleo pa komunidat.
Mirando alabes, kon Minister President a rekonosé ku falta di informashon na komunidat i Parlamento a kontribuí na e imahen negativo rondó di e proseso di negosashon ku gobièrnu a hiba na nòmber di komunidat ku CPR, ta importante pa Parlamento i komunidat, te kaminda ta posibel, ta informá di e pensamentunan aki.
P’esei hasiendo uso di artíkulo 33 di nos Reglamento di Òrdu, Suskritonan ta pidi un reunion di komishon sentral riba e tópiko ariba menshoná.
Pa e reunion aki nos ta invitá gerensia di RdK i Curoil pa ta presente i duna Parlamento un presentashon tokante e ideanan ku nan ta manehá pa kumpli ku e instrukshon di Minister.
Mirando e importansia i urgensia di e tema, nos ta supliká presidente pa yama e reunion aki ku karakter di urgensia.
Atentamente,
Quincy Girigorie Steven Croes Ana Maria Pauletta Zita Jesus-Leito
