B’A KONFIA? Ta ora pa ban papia tokante HIV/AIDS

 

Willemstad 13 di aprel 2023 – Fundashon Plòns Kòrsou (FPK) ta un plataforma ku tin komo meta pa konsientisá i eduká riba e tópiko di HIV/AIDS na Kòrsou. Nos ke inisiá kombersashon riba e tópiko aki na Kòrsou pa por kombatí stigmatisashon i stòp diskriminashon. FKP huntu ku Medical Laboratory Services ta lansa e kampaña B’A KONFIA?. “B’a Konfia?” ta un kampaña di konsientisashon tokante HIV/AIDS. E movementu aki tei pa inspirá, kibra tabú i stòp stigmatisashon. “B’a Konfia?” ta simbolisá ku e vírùs na basta okashon ta plama pa motibu di konfiansa i asta ignoransia.

Kon regular bo ta tèst pa kontrolá si bo no a wòrdu kontagiá ku HIV?
Esaki netamente ta e motibu ku Fundashon Plòns a desaroyá un kampaña pa huntu ku GGD, Curaplus, Salu pa Tur i tambe Famia Plania nos ta ban konsientisá komunidat di Kòrsou di e rísikonan ku tin pa por wòrdu kontagiá ku e vírùs di HIV. Pa medio di e kampaña aki nos kier ilustrá e importansia na kada persona ku ta aktivo seksualmente i no ta hasi esaki seif, pa tuma e akshon korekto. Bishitá bo dòkter di kas pa bo por tèst i evitá ku bo por ta lat i/òf un rísiko pa otronan den nos komunidat.

Nos kier stimulá komunidat di Kòrsou pa atendé ku e tópiko aki sin diskriminá i stigmatisá i alabes minimalisá kantidat di kontagio di HIV dor di kompartí e informashonnan korekto.

Ta importante pa konsientisá nos komunidat ku despues di un resultado positivo, bida no a kaba. Tin speransa i tambe organisashonnan manera Curaplus, Salu Pa Tur i Famia Plania ku ta kla pa duna sostené den e situashon difísil. Enbes di diskriminá i stigmatisá ban konsientisá i informá paso huntu nos por logra mas!

Danki na Medical Laboratory Services ku a kere den e proyekto aki pa por informá komunidat riba tópiko aki ku regularidat.

Sigui B’A KONFIA via FB i IG pa bo ta bon informá