Huida di 4 indokumentadó na SDKK

Bosero di SDKK, sr. Jabets Pinedo ta konfirmá ku awe den oranan di marduga, alrededor di 1or di marduga a tuma luga un huida di 4 indokumentadó na SDKK su departamentu di personal “Vreemdelingen”. E personal di seguridat ku tabata na warda diripiente a skucha un zonido fuerte (manera un eksploshon) i na momentu a kore bai wak, ya a topa e 4 sospechoso nan aki riba e delaster waya banda di Vrouwenafdeling ta bai.

Di akuerdo ku un investigashon preliminar, nan lo mester a logra di lòs e armatuur kompletu ku tin na nan sèl, pa despues kibra e waya ku tin na e “luchtruimte” pa por logra sali pafó. E kuater venezolano nan aki lo mester a aktuá bastante rápido i lo mester investigá ta di ki manera nan a logra kibra e slòt, kual ta kosnan ku a bini for di Hulanda spesial pa e kompleho nobo aki.

Tantu personal di SDKK i tambe polisnan ta buskando for di marduga e kuater indokumentadonan aki, prosedente di Venezuela, pero no a logra hasi detenshon ahinda. Buskeda lo kontinuá durante dia awe i tambe investigashon lo kontinuá na e kompleho di sèlnan nobo riba tereno di SDKK.