Partido PIN ta konstatá weg’i palabra i manipulashon dor di kabinete Pisas
Willemstad, 19 aprel 2023
Partido PIN ta konstatá weg’i palabra i manipulashon dor di kabinete Pisas
PIN ta konstatá ku a eksponé un hungamentu ku informashon i sifra di forma indebidó dor di kabinete Pisas.
Pòrfin klaridat, ku Gabinete Pisas ta konta sèn bieu pa hustisia i protekshon di kosta komo su logro, i no a negoshá fondo pa ekonomia i kombatí pobresa!
Despues ku e rueda di prensa di gobièrnu dia 12 di aprel, esta mas ku un siman despues ku a firma e Onderlinge Regeling di 4 april 2023, a trese hopi konfushon i basta interogatorio i diskushon riba e pregunta si e karta di minister Wopke Hoekstra ta valido ainda, den kua na 2021 Hulanda a pone 457 mion disponibel pa 3 isla huntu repartí riba un periodo di 6 aña, ku e meta pa sostené ‘rechtshandhaving’, esta Kustwacht, Marechaussee, Grensbewaking, RST etc., ta resultá ku e suma disponibel pa e meta di ‘rechtshandhaving’ ta e mes un suma ya stipulá durante kabinete Rhuggenaath. Manera e vosero Ulandes a deklará na radio Hojer, ta sèn bieu, no ta nada nobo. Tambe ta resultá ku si kompará e suma menshoná na 2021 i awor ta pa e siguiente aña e suma ‘ekstra’ a simpelmente ‘tel door’ manera e vosero Ulandes a spliká na radio.
Kemen dimes e suma pa e aña ekstra ta den e konteo nobo, no ta un logro di negosashon. Pa klaridat, e sumanan aki ta basá riba e palabrashonnan bieu tokante rechtshandhaving. Kemen no ta un logro di gobièrnu aktual manera a keda presentá den rueda di prensa di gobièrnu.
Pa ehekushon di e 8 areanan di Landspakket, entre otro ekonomia, kuido i enseñansa, a keda konfirmá un biaha mas awe mainta ku e Onderlinge Regeling di 4 april di 2023 a pone solamente 30 mion euro pa aña durante 4 aña disponibel, di kua 6,5 mion ta bai pa e ‘werkorganisatie’ Ulandes i e sobra sèn, esta 23,5 mion euro ta pa e 3 paisnan huntu, kemen Kòrsou ta haña algu menos ku 8 mion euro pa aña pa ehekushon di e pakete di reforma den e Landspakket.
Sèn pa invershon den ekonomia i pa kombati probesa simpelmente no a keda negoshá pa por ehekutá e Landspakket!
Konklushon: e presentashon di Kabinet Pisas, di 18 di aprel, despues di kasi 1 siman di konfushon i diskushon den komunidat, un biaha mas ta simpelmente un hungamentu ku sifra kaminda ta presentá manera lo tin hopi sèn, ta resultá di un manipulashon ku informashon.
PIN ta sigui mustra riba importansha pa nos mes start aktividatnan ekonómiko nobo i sigui lihé ku refineria.
