Promé di mei ta ùltimo dia pa fundashonnan entregá petishon pa supsidio na SOAW.
Willemstad – Djaluna promé di mei awor, ta ùltimo dia ku fundashonnan por entregá petishon pa supsidio di akuerdo ku e proseduranan nobo di Unidat di Supsidio. Tur fundashon ku ya kaba ta risibí supsidio, lo mester hasi un petishon nobo pa aña 2024.
Den kuadro pa mehorá i optimalisá maneho di fondonan pa supsidio, SOAW a start ku Unidat di Supsidio na yüni 2022. Aktualmente tin 37 fundashon ku ta risibí supsidio serka SOAW. Via e Unidat di Supsidio, e ministerio por tin un bista muchu mas dirigí riba instansianan ku ta risibí supsidio i kon pa mehorá efektividat den realisashon di nan metanan. Lo mehorá tambe e proseso di ehekushon i kòntròl den kuadro di dunamentu di supsidio di manera ku ta kumpli ku e base legal, pero tambe ku e meta di supsidio otorgá ta keda salbaguardiá.
Via e link https://gobiernu.cw/wp-content/uploads/2019/07/P.B._2016__no._81.pdf na artikulo 22, por haña tur informashon relashoná ku dokumentashonnan ku fundashonnan mester entregá pa promé di mei 2023, pa por bin na remarke pa risibí supsido pa e aña entrante.
Por manda tambe un ‘e-mail’ na info@subsidie-unit.com òf infobalie@soaw.cw pa informashon. Tambe por yama e sentro di informashon di SOAW na 724 5333 òf na 724 5300.
Mester entregá tur dokumentu na e ofisina di Minister di SOAW den e edifisio di WTC na Piscaderaweg, i tambe mester manda e petishon ku dokumentashon via ímeil menshoná. Unidat di Supsidio ta pidi pa tene kuenta ku dianan liber den kuadro di e fecha promé di mei, ku ta ùltimo dia pa entregá dokumentashonnan pa petishon pa supsidio pa aña 2024.
