A firma akuerdo di kolaborashon ku Entidat Públiko Boneiru pa e proyektonan piloto ‘De Bibliotheek op School’ i ‘Boekstart’

Gobièrnu di Boneiru

A firma akuerdo di kolaborashon ku Entidat Públiko Boneiru pa e proyektonan piloto ‘De Bibliotheek op School’ i ‘Boekstart’
Kolegio San Luis Bertran, Skol Amplio Papa Cornes i akohida pa mucha Tia Sus dia 18 di aprel 2023 a firma un akuerdo di kolaborashon ku Entidat Públiko Boneiru pa komienso di e proyektonan piloto ‘De Bibliotheek op School – Biblioteka na Skol’ i ‘Boekstart – Ranka Sali ku Buki’. Ku e proyektonan piloto akí e dos skolnan i e akohida pa mucha akí strukturalmente ta risibí sosten di parti di Biblioteka Públiko Boneiru. Komo parti di e sosten akí konseheronan riba tereno di lesamentu ta yuda por ehèmpel dosentenan i alumnonan ku promoshon di lesamentu i abilidat di informashon. Nan ta ofresé yudansa tambe pa hinka un biblioteka bunita organisá den otro na skol ku un kolekshon atraktivo di buki i un sistema di fia buki outomatisá, ku kua e muchanan por fia buki pa bai kas kuné. Via e katalòk digital por reservá e títulonan deseá na Biblioteka Públiko Boneiru. For di e proyektonan piloto akí a kapasitá empleadonan di ámbos skol, e akohida pa mucha i Biblioteka Públiko Boneiru komo kordinadó di lesamentu i konsehero riba tereno di lesamentu.