Minister di Hustisia, mr. Shalten Hato, a tene awe mèrdia 3or un reunion ku representantenan di e sindikatonan SAP, STRAF, NAPB i ABVO, relashoná ku e preokupashonnan laboral di e ámtenarnan ku ta traha bou di ORV.

E reunion a tuma lugá den un esfera ameno i konstruktivo, kaminda tur partido a haña espasio pa ekspresá nan puntonan di bista. Durante e reunion, sindikatonan i tambe e personal presente a haña mas klaridat riba diferente tema ku nan tabata kier mas informashon for di Minister Hato, kual ta inkluí e situashon aktual di ORV i e proseso ku ta bini pa dilanti.

E sindikatonan a mustra tambe nan preokupashon riba e echo ku ainda no tin un buki di funshon pa ORV, loke ta krea inseguridat pa e ámtenarnan.

Minister Hato a skucha ku atenshon e señalnan ku a wòrdu duna i a reiterá su kompromiso pa sigui den diálogo ku e sindikatonan, ku meta pa traha huntu na un solushon duradero ku ta garantisá klaridat, seguridat laboral i rèspèt pa e derechonan di e ámtenarnan.