” Di akuerdo ku miembro di parlamento Ramón Yung MESTER RE-EVALUA INTRODUKSHON DI FLORIN KARIBENSE OF DOLER NA KORSOU “

Di akuerdo ku miembro di parlamento Ramón Yung

MESTER RE-EVALUA INTRODUKSHON DI FLORIN KARIBENSE OF DOLER NA KORSOU

WILLEMSTAD,- Parlamentario pa frakshon di MFK, Ramón Yung durante e reunion dia 24 di aprel último a ekspresá su preokupashon riba introdukshon dje florin karibense i a bisa di ta kere ku mester bin ku un evaluashon nobo riba intrdukshon di florin karibense of dolarisashon di ekonomia di país Kòrsou.

Di akuerdo ku parlamentario Ramón Yung, mester bolbe evaluá kua dje opshonnan ta mas ideal pa nos país. Instansianan manera CBCS i MEO, teniendo kuenta ku e desaroyonan di geo-polítika, mester hasi investigashon i traha rapòrtnan públiko riba e posibel impakto ku devaluashon di dòler lo por tin riba ekonomia di Kòrsou

Ta di sumo importansia pa studia kiko e konsekuensianan di introdukshon di un valuta nobo òf e traspaso pa dolarisashon lo tin. E desishon pa introdukshon di un valuta nobo, o sea florin karibense pa Sint Maarten i Kòrsou ta data for di 2006, pues sigur tin motibunan bálido pa hasi un estudio nobo riba e situashon, teniendo kuenta ku e panorama finansiero ekonómiko di Ko3rsou i ekonomia mundial a konosé kambionan supstanshal durante último 17 añanan.

Na momento di un kambio asina importante, Ministerio di asuntunan ekonómiko (MEO) i Banko Sentral (CBCS) mester traha riba un posibel plan di emergensia. Esaki ta nesesario, teniendo kuenta ku e paisnan den BRICS i asta Oropa, aktualmente kier ta ménos dependiente di dòler i Estados Unidos. Esaki por tin konsekuensianan monetario, finansiero, ekonómiko i geo-politiko pa Kòrsou. P’esei ta krusial pa CBCS i MEO hasi investigashonnan i traha rapòrtnan públiko i duna konseho riba e posibel konsekuenshanan ku eventual devaluashon di dòler lo por tin pa ekonomia di Kòrsou

Ta bon pa tantu Gobièrnu komo Parlamento, evaluá e materia aki di forma kouteloso i mira kua opshon lo tin mayor benefisio pa nos país. Ta bon pa enfatisá ku mirando e situashon finansiero aktual di país i e efekto riba ekonomia di Kòrsou, ta na su lugá pa e desishon di kambio di valuta ta basá riba dato i investigashonnan.