Pronto lo kuminsá limpia áreanan afektá pa Sargassum ku ta kousa molèster

Pronto lo kuminsá limpia áreanan afektá pa Sargassum ku ta kousa molèster

Willemstad – Minister di Asuntunan General enkargá ku e sektor di agrikultura, medio ambiente i naturalesa di Ministerio di GMN señor Gilmar Pisas, ta mustra ku su sektor a keda traha riba e problemátika di Sargassum na algun área na kosta di Kòrsou. Ta preparando pa e fase di destaho manera komptabilidat ta preskribí pa yega na ehekushon di limpiesa di e áreanan. Lo informá komunidat momentu ku tur kos ta na lugá pe parti di limpiesa aki kuminsá.

E áreanan mas afektá pa Sargassum ta Ascencion i Sint Joris. Na Ascencion e kousando basta molèster pa habitantenan i p’esei e urgensha pa atendé ku e situashon. Komo tabatin asina tantu Sargassum ta yega nos isla diariamente, no tabatin muchu sentido pa kuminsá limpia mas promé. Bon notisia ta ku por lo pronto práktikamente no tin mas Sargassum ta bini den nos direkshon kual ta e momentu ideal pa ehekutá e proyekto di limpiesa.

Sektor di medio ambiente riba indikashon di Minister Pisas ta evaluando diferente opshon pa bini ku un solushon duradero pa e molèster di Sargassum ku anualmente ta presentá. Den esaki a wak tambe kon otro islanan den Karibe ta atendé ku e situashon. Aktualmente Wardakosta ku tin bista amplio riba laman lo keda monitoriá e situashon i lo mèldu Ministerio di GMN momentu ku esaki ta nesesario.