KLIENTENAN DI SDKK A PARTISIPÁ NA ‘BEAUTY DAY’ NA KLÍNIKA CAPRILES

WILLEMSTAD – Resientemente 5 kliente di Sentro di Detenshon i Korekshon Kòrsou (SDKK), bou di guia di personal di SDKK, a hasi un bunita proyekto titulá ‘Beauty day’  na Klínika Capriles. Meta prinsipal tabata pa e 5 klientenan ku den pasado a sigui e kurso di barbero, a haña oportunidat pa por pela òf hasi kabei di mas di 30 kliente di departamento Medium Stay 1-4 na Klínika Capriles.

Ku amor i dedikashon e klientenan di SDKK a duna un bon servisio i atenshon na kada kliente ku nan a atendé. Na e okashon akí sra. Martinus i sra. Maduro di Klínika Capriles a gradisí prizòn pa e bunita proyekto akí. Tambe demas trahadó i klientenan di Klínika Capriles a keda sumamente kontentu ku e proyekto akí i siguramente lo bai tin mas di e proyektonan akí den futuro. Riba kombinashon di pòrtrèt por mira e klientenan di SDKK ku a pela e klientenan di Klínika Capriles huntu ku personal di tantu SDKK komo Klínika Capriles.