Petishon pa dirigí pregunta na Minister di Enseñansa, Siensia, Kultura i Deporte

 

 

 

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 20 di aprel 2023

 

Tópiko: Petishon pa dirigí pregunta na Minister di Enseñansa, Siensia, Kultura i Deporte

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Enseñansa, Siensia, Kultura i Deporte señor Sithree van Heydoorn.

 

Danki pa e koperashon.

 

Atentamente,

 

 

 

David Seferina

Parlamentario pa

frakshon di MFK

 

Minister di Enseñansa, Siensia, Kultura i Deporte

Señor Sithree van Heydoorn

PRESENTE

Kòrsou, 20 di aprel 2023

Tópiko: Parlamentario Seferina preokupá pa “Little League Ballpark “ na Muizenberg

 

Apresiabel señor Sithree van Heydoorn,

 

Parlamentario Seferina a tuma nota di e preokupashon ku tin serka di nos hóben peloteronan, pero tambe serka fanátikonan di e deporte di beisbòl, relashoná ku e parke di Muizenberg.

Despues ku Parlamentario Seferina a tuma nota di un grabashon ku ta sirkulando rònt kaminda ta mustra e estado deplorabel di ” Little League Ballpark” na Muizenberg, mi a buska mas informashon i suskrito a bin komprondé ku a pasa e stadion den man di un fundashon.

E fundashon aki lo mester a desaroyá e parke aki di tal manera ku e ta kumpli ku eksigensia nan di “ Little League” beisbòl i konforme standart nan di e parke na Williamsport.

Akuerdo di gobernashon 2021-2025 ta papia di promové deporte dor di krea mas fasilidat nan deportivo i netamente p’esei, Parlamentario Seferina ta preokupá. Mirando ku e stadion aki ta bandoná fo’i aña 2014.

E Stadion aki a marka historia inolvidabel i sinta mira e parke bai pèrdí no ta un opshon. Awor mas ku nunka mester duna e Stadion aki tur e atenshon nesesario despues ku na aña 2022 vários selekshon di “Little League” a titulá kampion den e área di Latino Amérika i un di e selekshon nan aki a Sali number dos di mundu na Williamsport Pennsylvania.

P’esei Pa medio di e karta aki i hasiendo uso di artíkulo 96 di Reglamentu di órden di Parlamento, suskrito kier hasi e siguiente preguntanan na Minister di Minister di Enseñansa, Siensia, Kultura i Deporte Señor Sithree van Heydoorn.

 

1. Minister por splika Parlamento kua ta e palabrashon ku Gobièrnu tin ku un fundashon pa loke ta trata e parke menshoná i si Parlamento por risibí e dokumentonan korespondiente?
2. Minister por splika Parlamento ku e fundashon aki a òf ta kumpliendo ku e palabrashon aki?
3. Si e fundashon no kumpli i/òf violá palabrashonnan, kiko gobièrnu ta pensa pa hasi?

4. Minister por splika parlamento kuantu tempu mas mester warda riba e fundashon, pa ku e invershon di proyekto aki?
5. Minister ta na altura ku e parke aki ta unu hopi ku por sirbi e hóben nan ku ta práktika e deporte di beisbòl den nan desaroyo?
6. Gobiernu mes ta dispuesto pa inbertí den e parke aki?
7. Minister a purba via di e representantenan pa papia ku esun na kabes di fundashon ku lo mester a drecha e parke aki?
8. Si e kontesta ta afirmativo, kiko ta resultado di e kombersashon aki?

 

Sperando ku Minister lo kontesta nos karta den e tempu definí den e protokòl firma entre gobièrnu di Kòrsou i Parlamento.

 

 

Atentamente,

 

 

 

David Seferina

Parlamentario pa

frakshon di MFK