MINISTER COOPER TA RISIBÍ BISHITA DI CEO DI BLUE NAP AMERICAS

Wilemstad – Riba djamars 2 di mei, Minister Charles Cooper a risibí bishita di CEO di Blue NAP Americas (BNA), Sr. Giovanni King. Esaki ta den kuadro di desaroyo relashoná ku Kòrsou su sentro di data. Huntu ku Sr. King, Minister Cooper a topa ku un eksperto riba tereno di protekshon di datos personal, esta Sr. Profesor Romeo Kadir.

Motibu di e bishita aki ta den kuadro di preparashonnan pa un charla ku lo tuma lugá riba 5 di mei próksimo, durante kual Sr. Prof. Kadir lo ampliá riba importansia di e tema protekshon di datos personal, i sertifikashon di BNA riba área legal di protekshon general di datos personal europeo (GDPR).

Sr. Prof Kadir a elaborá riba e echo ku e sertifikashon ta importante pa posishonamentu di BNA komo e úniko sentro di data nivel Tier IV den region. Tambe ku esaki lo ta un empuhe pa e proyekto ku Minister Cooper ta karga, pa  posishoná Kòrsou komo un hub digital pa America. Sr. Prof. Kadir a indiká ku e desaroyo aki ta di importansia pa tur organisashon na Kòrsou.

Pa mas informashon tokante e charla di dia 5 di mei, por bishitá e website: https://www.bluenapamericas.com/events/