MINISTER COOPER TA DUNA KONSESHON PA UN KOMPANIA NOBO DEN TELEKOMUNIKASHON
MINISTERIO KONSERNÍ TRÁFIKO, TRANSPORTE I PLANIFIKASHON URBANO
MINISTER COOPER TA DUNA KONSESHON PA UN KOMPANIA NOBO DEN TELEKOMUNIKASHON
PUBLIKÁ RIBA 07 MEI 2023
Willemstad – Pa por duna pueblo di Kòrsou mas posibilidat pa skohe, i haña mihó tarifa riba e tereno di telekomunikashon, esta entre otro internèt, telefon selular, i uso di data, Minister Cooper ta duna konseshon na e kompania Evolving Communications N.V komo proveedor nobo di servisionan di telekomunikashon.
Esaki ta enserá ku Evolving Communications lo por hasi konstrukshon, mantenshon, i eksplotashon di infrastruktura pa telekomunikashon públiko di distansia largu.
Aktualmente tin 2 kompania ku ta ofresé komunidat servisio di telekomunikashon, esta Flow i Digicel. Minister Cooper awor ta sòru pa bin un kompetidor mas riba merkado.
Pronto Aqualectra tambe lo kuminsá funshoná den e merkado di telekomunikashon aki, komo proveedor bou di e nòmber AquaTel.
Di e forma aki, ta amplia e opshonnan ku pueblo tin pa e mes por skohe e kompania ku ta dun’é mas mihó servisio.
