EVENTO EKSITOSO DI MEDISINA KULINARIO ORGANISÁ PA LABDEMED

Willemstad 9 di Mei 2023- Resientemente Laboratorio de Médicos (LABdeMED) tabatin su promé eksperensia di medisina kulinario. Durante di dos seshon interaktivo, unu mainta i unu atardi, un total di mas o ménos 50 persona a siña di forma práktiko kon nan por kushiná platonan nutritivo i sukulento ku ta bon balansá (plant-forward) i pagabel. E seshonnan kulinario a tuma lugá bou di guia di Dr. Ellen Visscher i Dr. Monique van de Wall Arneman di Dutch Caribbean Lifestyle Clinic kende ta dòkternan di kas i alabes shefkòknan spesialisá riba e tereno spesífiko aki. Meta di e seshonnan aki tabata pa konsientisá pueblo di Kòrsou tokante prevenshon di malesanan króniko dor di adaptá estilo di bida atraves di loke nos ta kome i bebe diariamente. Mas ku mitar di nos poblashon tin un òf mas malesa króniko manera problema di sobrepeso, diabétis i kurason. Ta notabel ku pashèntnan di diabétis no ta kuida tur ora manera mester ta, hopi biaha pa falta di konosementu, kual ta hiba na konsekuensianan serio pa e salú. Di e forma aki LABdeMED a inisiá ofisialmente su siman di diabétis i e serie di aktividatnan ku lo tuma lugá ku e meta pa konsientisá i eduká.

 

Despues di un introdukshon informativo tokante e importansia di un estilo di bida balansá, partisipantenan a drenta kushina i pone man na obra. Konhuntamente nan a prepará un total di 10 reseta variá di entre otro salada, sòpi, ‘tussendoortje’, stobá i pasaboka. Aki nan a siña tokante ingredientenan alternativo ku por usa na lugá di por ehèmpel suku i karni. Na final di e seshonnan partisipantenan por a disfrutá di e trabou di nan mannan den un ambiente ameno i sosial. Tambe nan a risibí nan buki di reseta pa asina sigui eksperimentá na kas pa poko poko alkansá un estilo di bida ku ta mas balansá i na benefiso di e salú.

 

Partisipantenan tabata sumamente satisfecho ku e konosementu nobo ku nan a atkerí i nan tabata entusiasmá pa bai kas i kompartí ku nan sernan kerí. Asina’kí LABdeMED a kontribuí pa yuda introdusí e konsepto nobo di medisina kulinario na nos komunidat, ku e meta pa oumentá konosementu i asina prevení malesanan króniko.