FFK TA DESAPROBÁ VIOLENSIA DEN DEPORTE!

 

Resientemente por a tuma nota den medionan di komunikashon i riba retnan sosial ku durante weganan di fin di siman a surgi algun kaso di violensia entre hungadónan. FFK ta desaprobá tur tipo di akto di violensia sea riba vèlt òf pafó di vèlt. E deporte rei ta para pa rèspèt i union, trahando huntu pa un meta i esei ta desaroyo di futbòl riba nivel lokal i internashonal. FFK su enfoke ta pa trese un esfera sano i seif pa tur ku ta praktiká futbòl pero tambe pa tur fanátiko ku ta asistí na nos partidonan, sin importá edat, sekso i kredo.

 

FFK ta duna di konosé ku lo bai investigá e kaso aki i prosedé di manera estrikto kontra esnan ku a hasi na mes kulpabel di e aktonan di violensia aki.

 

FFK ta pidi tur futbolista, fanátiko i pueblo en general pa laga positivismo i empatia resaltá den kada kurason pa huntu nos konstruí un pais dushi pa tur ku ta biba i bishitá nos dushi Kòrsou.

 

9 mei 2023