Agregá HIV/AIDS komo punto di agènda na e siguiente IPKO
Pa via di: Presidente di Parlamento
Sra. America Francisca
Wilhelminaplein #4
Presente
Na atenshon di: Presidente di komishon Asuntunan di Reino, Relashon Interparlamentario i Asuntunan Eksterior (komishon Rijks)
Sr. Thode
Wilhelminaplein #4
Presente
Kòrsou, 21 mei 2023
Tópiko: agregá HIV/AIDS komo punto di agènda na e siguiente IPKO
Apresiabel sr. Thode,
E prevalensia di e epidemia di HIV na Kòrsou ta por lo ménos di 0,53%, Aruba 0.37 % i Boneiru 0.3 %, esaki kalkulá a base di e kantidat di personanan ku a keda diagnóstiko, dùs no ta un prevalensia realístiko. E realidat ta ku Kòrsou no tin un bista ainda di e kantidat di personanan infektá ku e vírus di HIV.
Resientemente SPIRIT i Red Cross Blood Bank Foundation a organisá un investigashon na HIV/AIDS den Aruba, Boneiru i Kòrsou. Por tuma nota di e resultadonan di e investigashon pa Kòrsou riba e siguiente link: https://aidsfonds.nl/media/3295/factsheet-spirit-curacao.pdf
E investigashon ta duna un bista di e situashon lokal, pero tambe di e similitutnan ku nos pais rumannan den Reino. E investigashon aki ta mustra e forsa di traha huntu den Reino. Den kuadro di esaki mi petishon na Komishon Rijks. Si nos kier kombatí e pandemia aki i mira e sifranan di kontagio den Reino baha, nos mester traha huntu komo paisnan. Kolaborashon riba tereno di krea konsientisashon, eliminá informashon robes i redusí e stigma, ofresé tratamentu i i medikashon adekuá den Reino kompleto, garantisá un vishon di prevenshon; mester keda deliberá.
Durante di e temporada di 1 te ku 5 di yüni di 2023 parlamentonan di reino lo reuní den plataforma di IPKO. E plataforma aki a demostrá su potensial di kolaborashon riba tópikonan manera di salubridat i enseñansa. E agènda di IPKO yüni 2023 ainda no ta konosí, pero igual lo mi kier proponé na Komishon Rijks pa agregá e tópiko riba agènda. Den kaso ku e tema no por keda agregá, e petishon ta pa deliberá riba e tópiko di un manera informal ku e demas miembronan di IPKO, ku intenshon pa yega na palabrashonnan konkreto.
Suskrito ta mas ku ku dispuesto pa duna mas informashon ofer di e tópiko na e komishon di Rijks i tambe por tuma kontakto ku e komishon enkabesá pa enparte dr. Duits ku a realisá e investigashon.
Danki di antemano,
Ana Maria Pauletta
Miembro di Parlamento, Partido Alternativa Real

