Pueblo ke sa kon ta pará ku ehekushon di reforma

Pueblo ke sa kon ta pará ku ehekushon di reforma

Si Onderlinge Regeling ta bin parlamento estilo mostert na de maaltijd, sikiera bin staten mesora ku státus dje reformanan si!

 

Willemstad — Parlamento ta habri siman ku reunion públiko i di komishon sentral riba e onderlinge regeling — areglo mutuo — ku a remplasá COHO. E reunionnan ei ta lat riba tur oloshi, ma Partido PIN ta kontentu ku sikiera nan ta tuma lugá. PIN i pueblo lo ta ainda mas kontentu si mesora tambe por tende foi gobièrnu su boka kon ta pará ku e reformanan i si tin un skema pa periódikamente informá parlamento riba avanse òf retraso den desishon i implementashon di reforma. No tin tempu pa pèrdè ku adelanto di nos pais.

 

Pakiko

A prepará e Areglo Mutuo den un nubia di sekreto. Despues di firm’e a start un diskushon riba supuesto èkstra benefisionan finansiero no-eksistente. Partido PIN ya a indiká ku al final e diskushonnan ei no tin sentido paso e Areglo Mutuo no ta un kuestion di lòs plaka for di Hulanda. Pa PIN, siguiendo e ideologia humanista-kristian, e balor di e akuerdo den Reino ta e oportunidat pa nos mes karga nos responsabilidat. Ta na nos pa mehorá loke ta bon i drecha loke ta malu den e 8 áreanan ku e landspakket ta kubri.

Indudablemente tur grupo sosial mester duna su aporte pa logra éksito ku e akshonnan premirá den Kòrsou su landspakket. P’esei ta lamentabel ku te ainda ningun biaha gobièrnu no a bin parlamento pa splika kon leu ta ku ehekushon dje medidanan den landspakket. Esei ta pone komunidat keda den skuridat, pèrdè oportunidat pa aportá i mira su adelanto keda posponé.

 

Pregunta

P’esei Partido PIN ta pidi nos representantenan pa probechá e dos reunionnan di e siman aki riba e tema pa buska kontesta riba sikiera e siguiente preguntanan:

1. kon gobièrnu mes ta haña ku ehekushon di landspakket ta bayendo?
2. gobièrnu por splika dikón ainda e medida pa kòrta den penshun dor di baha duurtetoeslag ta den e landspakket?
3. ainda gobièrnu tin pensá pa kobra un kontribushon individual (‘eigen bijdrage’)  for di hende malu ku mester bai dòkter òf hòspital?
4. ainda gobièrnu ke baha su servisionan na nivel di region (Haiti-San Domingo-Venezuela)?
5. dikon kada bes k’un ‘Uitvoeringsrapportage’ riba e landspakket sali, nunka ainda gobièrnu no a bin parlamento pa splika na plaka chikí i na Papiamentu kon leu nos ta?
6. gobièrnu tin intenshon pa den futuro si bin staten mesora pa duna kuenta i rason riba kada ‘Uitvoeringsrapportage’ i tambe tradusí e reportage na Papiamentu?
7. ki gobièrnu su eskoho di prioridat ta tokante tur loke tin pará den e landspakket?

 

Klaramente gobièrnu Pisas tin hopi pregunta di kontestá den e kuestion aki. Sinembargo ya a bira tempu pa henter staten, ku esnan ku ta karga e bandera di dualista na promé lugá, asumí su responsabilidat, por ehèmpel pasando un moshon den kual ta preshoná gobièrnu pa kada bes ku un ‘Uitvoeringsrapportage’ keda publiká, bin parlamento pa splika státus di e reformanan.