Donashon di $10,000 di Digicel Atletanan di Special Olympics ta kla pa Weganan Mundial na Berlin

Donashon di $10,000 di Digicel

Atletanan di Special Olympics ta kla pa Weganan Mundial na Berlin

 

Willemstad, Mei 2023: E tim di Special Olympics Curaçao ta den full preparashon pa World Games 2023 na Berlin. Ku e sosten di Digicel, un total di 15 atleta lo biaha pa Berlin den luna di yüni próksimo. Den henter Karibe ta preparando aktividatnan pa deseá e atletanan éksito i kuminsá e konteo ofisial pa World Games. Na Kòrsou esaki no ta un eksepshon; Digicel tambe ta uni su mes pa selebrá e tim di Special Olympics i duna e atletanan un empuhe èkstra pa alkansá éksito. 

Djamars último Digicel a hasi un opsekio di $10,000 na Special Olympics Curaçao. E aña aki ta duna usuarionan di Digicel tambe chèns pa sostené e tim di Special Olympics Curaçao. Por hasi un donashon direktamente pa e tim. Usuarionan di Digicel por SMS “BERLIN” na 5151, ku kada SMS ta aportá ku 1 florin na e fondonan di Special Olympics Curaçao. Esnan ku no ta kliente di Digicel por aportá ku un donashon via number di kuenta MCB 11954107 riba nòmber di Stichting Special Olympics.

Nadine Van Der Woude, Marketing Executive pa Digicel Kòrsou a komentá, “Digicel ta aportando na e atletanan spesial for di aña 2004, ku un solo meta; pèrkurá pa niun hende wòrdu lagá atras. Nos ta partikularmente kontentu di por sostené nos atletanan lokal miéntras e tim ta den preparashon pa nan partisipashon na Weganan Mundial i representá Kòrsou.” E aña aki e Special Olympics World Games lo ta for di 17 pa 25 di yüni, 2023, ku partisipashon di  7,000 atleta i partnernan ku a uni pa e gran evento for di 170 pais kompitiendo den 24 disiplina.

Digicel Kòrsou a bin ta sostené proyekto -i aktividatnan di Special Olympics desde inisio di su operashonnan aki na Kòrsou. Nan ta un parti importante di e famia grandi di Digicel.  E fundador i Presidente di Digicel Group, Denis O’Brien, ta Presidente tambe di e Konseho di Patrosinador di Special Olympics na Irlanda. O’Brien ta komentá,”Special Olympics ta duna oportunidat na esnan ku un limitashon físiko pa bria, i pa hende di diferente pais i kultura, topa otro i sobresalí riba prehuisio mediante e poder di deporte. Digicel i Ami personalmente semper lo sostené esei. E aña aki, nos ta sostené mas di 250 atleta di 11 pais na e Weganan Mundial. Mi ke deseá nan tur kos bon i hopi éksito miéntras nan ta kompetí pa representá nan pais.”

Kolektivamente, den 11 merkado di Digicel tin 258 atleta kompitiendo den e Weganan Mundial, ku ta nifiká ku nos no ta únikamente apoyando Kòrsou òf Aruba , pero tur otro merkado di Digicel. Entre nan Antigua, Dominica, Guyana, Haiti, Jamaica, Saint Lucia, St. Vincent i Grenada, Sürnam, i Trinidad & Tobago.

For di aña 1968, ku a tene e promé Special Olympics International Games, mundu a superá limitashon geográfiko, nashonalidat, filosofia polítiko, género, edat, kultura i religion pa bini huntu kada 2 aña i selebrá Special Olympics World Games. E weganan aki a bira un evento prinsipal pa Special Olympics i a krese bira un demostrashon internashonal di inklushon, akseptashon i union.