“BO TA MIDI PROGRESO DI UN PAIS ORA BO MIRA SU MUCHANAN TA PROGRESA”
Premier Evelyn Wever – Croes na inicio di WE 2023:
“BO TA MIDI PROGRESO DI UN PAIS ORA BO MIRA SU MUCHANAN TA PROGRESA”
Hopi exito na tur cu ta participa!
ORANJESTAD – Diabierna a tuma luga e ceremonia oficial di inicio di Weganan Escolar (WE) 2023. Prome Minister Evelyn Wever – Croes a hiba palabra na e ocasion yamando tur esnan presente bon bini y deseando tur cu ta participa exito. Entre e invitadonan presente tabata Presidente di Parlamento Edgar Vrolijk, miembronan di Parlamento di Aruba, Minister di Deporte Endy Croes y grupo grandi di muchanan hunto cu nan famianan. Premier Wever – Croes a haci uzo di e oportunidad pa elogia Minister Croes pa su compromiso y trabou duro pa tin continuacion di e WE.
Prome Minister Evelyn Wever – Croes a expresa cu na Aruba hopi biaha ta bon den organisa y cuminsa cu un evento, sinembargo ora cu ta bin na continuacion di esakinan, sa mira retonan. Aña pasa despues di basta tempo tabatin apertura di Weganan Escolar y na e ocasion Minister di Deporte Endy Croes a priminti cu ta bay sigui cu e Weganan Escolar. Awe hunto cu henter e ekipo conhuntamente cu maestro/a nan y tambe scolnan, ta cumpliendo cu nos muchanan y dunando continuacion na Weganan Escolar. Prome Minister Wever – Croes den nomber di Gobierno di Aruba ta gradici cada un persona cu ta haci esaki posibel.
“Cada biaha cu mi hiba un discurso y mi bisa cu Aruba ta den recuperacion pasobra economia ta bay bon, turismo ta bay bon, finanza ta bayendo mihor y desempleo ta bahando ta berdad. Pero, bo ta midi progreso di un pais ora bo mira su muchanan ta progresa y nos muchanan ta progresa mas a traves di deporte. Gobierno di Aruba por haci apenas un parti di e trabou, ta danki na trabou duro di mayornan, hobennan, docentenan, Parlamentarionan, y tur e lidernan den diferente actividad deportivo cu ta haci esaki posibel.”
Premier Wever – Croes a gradici tur cu ta contribui na progreso di muchanan, especialmente Minister Endy Croes kende ta un persona determina y awe nos tur por gosa di e esfuersonan haci. Ohala cu e weganan aki ta hopi exitoso pa cada un cu ta participa y ohala cu tin continuacion di Weganan Escolar pa hopi tempo mas. Hopi exito pabien y masha danki, Prome Minister Wever – Croes a termina bisando.
