ORGANISASHONNAN DI KRÍSIS DI GOBIÈRNU DI KÒRSOU TA PREPARÁ PA TEMPORADA DI ORKAN 2023

WILLEMSTAD –  E diferente organisashonnan ku ta forma e ‘Crisisbeheersings- en Rampenbestrijdingsorganisatie’ (CRBo) a informá Promé Minister Gilmar Pisas tokante e preparashonnan pa temporada di orkan. Esaki a sosodé riba e promé dia di periodo di orkan di aña 2023, dia 1 di yüni 2023. E temporada ofisialmente ta kaba na fin di novèmber. CRBo di Kòrsou ta e tim di kalamidat ku den un situashon di krísis òf kalamidat ta responsabel pa manehá e situashon i mitigá e riesgonan di un krísis òf kalamidat.

CRBo ta repartí den 10 Emergency Support Functions (ESF) i nan representantenan di entre otro Polis, Brantwer, Ambulans, UTS, BT&P, WJZ, Aqualectra, Servisio di Obranan Públiko, Ministerio di SOAW, Direktorado di Komunikashon i Informashon, Ministerio di Hustisia, Ministerio di Desaroyo Ekonómiko, Wardakosta, Meteo, Ministerio di GMN, Krus Kòrá, CITRO i asistentenan boluntario.

Durante e reunion a pasa den e prosesonan di plan di kalamidat pa temporada di orkan. Kada un representante a duna un relato di nan preparashon pa e temporada di orkan. Brantwer por ehèmpel a ekipá e diferente pòstnan ku èkstra ekipo ku por ta nesesario si bin mal tempu. Kuerpo polisial i tambe Servisio di ambulans ta prepará pa kualke eventualidat den kuadro di e temporada di orkan. Servisio di Obranan Públiko tambe ta prepará i a hasi inspekshon na e diferente espasio ku eventualmente por fungi komo ‘shelter’ ora esei ta nesesario.

E tim di kalamidat ta henter aña aktivo pa prepará pa kualke kalamidat. Esaki bou di kordinashon di Direktorado di Kontròl di Riesgo i Maneho pa Kalamidat. Konhuntamente e tim di kalamidat ta yuda mitigá e konsekuensianan ku un krísis òf kalamidat por tin na Kòrsou. Resientemente den luna di aprel a organisá e promé edishon di e “Preparedness week” kaminda diferente organisashon a informá i demostrá pueblo di Kòrsou kua ta e trabounan ku nan ta ehersé durante un situashon di krísis òf kalamidat. Importante ta pa tur hende riba su mes, den seno familiar i na trabou, kòrda riba e preparashonnan nesesario. Preparashon ta e parti mas importante pa por rekuperá mas mihó i mas lihé for di kualke krisis.

Komo rekordatório di kiko tur hende por hasi, e siguiente lista:

• Sòru pa tin un plan di kalamidat na kas pa den kaso di un menasa di orkan;
• Kontrolá ekiponan di emergensia i ekiponan ku ta usa bateria manera radio, flèshlait i telefòn selular. Sòru pa èkstra bateria;
• Sòru pa kuminda ku no ta daña i sufisiente awa pa bebe (3 liter pa persona pa dia) pa minimal 3 dia;
• Kòrta palu i mata den kurá ya ku takinan ku ta bula rònt por kousa daño na bo mes kas i na kasnan den besindario.

Pa mas informashon por bishitá www.kalamidat.cw.