Kontinuashon di reunion Interparlamentario di Reino, IPKO.

Kontinuashon di reunion Interparlamentario di Reino, IPKO.

Djabièrnè 2 di yüni 2023 a kontinuá ku e di 2 dia di IPKO, ku a tuma lugá na Den Haag.
E reunion a kuminsá ku un presentashon di e tim enkargá ku e preparashonnan di e trayekto pa yega na un museo Nashonal di sklabitut na Amsterdam. Segun sr. John Leerdam i sra. Peggy Brandon, ku ta forma parti di e tim, por spera ku e trayekto lo ta kla den 2028/2029.
E reunion a kontinuá ku e tema di pasado di sklabitut i kolonialismo, kaminda e miembronan di e delegashonnan a diskutí, kon ta duna kontenido na e siguiente trayekto, despues ku Gabinete Hulandes a pidi diskulpa pa e periodo di sklabitut. Resientemente Parlamento di Kòrsou a trata e tópiko aki i pasa un moshon.
Despues di esei, a sigui ku e parti será, ku ta kontinuashon di un punto ku a keda tratá ayera, esta e konsepto di Lei di konsenso di Reino riba e tema di Protekshon di Informashon (Consensusrijkswet gegevensbescherming).
E siguiente tópiko ku a keda tratá den e reunion públiko, tabata e konferensia di reino. Apesar ku tur e delegashonnan a bai di akuerdo durante e último IPKO, pa nan tambe forma parti den e Konferensia di Reino, te ainda no ta kla, kiko lo ta nan ròl den e konferensha. Prome ku konklui e IPKO presidio lo duna un konseho riba e rol ku Parlamentonan lo por tin den e konferensia di reino ku lo keda organisá na Sint Maarten.
Mas atardi sr. Ed Nijpels, ku a skibi un rapòrt tokante e situashon di klima na Boneiru, a duna un presentashon na e delegashonnan. Un di su konklushonnan prinsipal ta, ku mester di mas kapasidat pa mantenshon di òrdu relashoná ku klima riba e islanan.
A sera e di 2 dia di IPKO, ku e splikashon di Ombudsman di Hulanda, tokante e progreso despues di publikashon di e rapòrt ‘Kopzorgen van Caribische studenten’. Por a konkluí ku te ainda no a kuminsá ku ehekushon konkreto di varios puntonan inkorporá den e rapòrt aki.