Depositogarantiestelsel pa pueblo di Kòrsou

Na: Minister di Finansa

Sr. J. Silvania

Pietermaai 17

 

Willemstad 2 yüni 2023

 

Tópiko: Depositogarantiestelsel pa pueblo di Kòrsou

 

 

Honorabel sr. Silvania,

 

Nos ta tuma nota ku e sistema finansiero aki na Kòrsou ta den moveshon kontinuo i nos por a mira kiko a pasa ku Giro pa loke ta trata e konfiansa ku pueblo di Kòrsou a pone den e instituto aki pa atendé ku nan sèn ku nan a spar. Gobièrnu di Kòrsou finalmente mester a drenta aden  pa  salbaguardiá  e interes di e klientenan mas tantu posibel.

 

E situashon na GIRO a krea bou di nos komunidat un inseguridat i a kibra e konfiansa ku pueblo di Kòrsou a pone den e instituto aki. Doloroso ta ku bo ta kere ku bo sèn ta sigur na un instansia i ku bo no mester preokupá pa ku esaki.

 

Den otro pais tin un sistema di garantia pa klientenan di bankonan “Deposito garantiestelsel” kual ta protehá e sèn di klientenan di e banko. Esaki kiermen ku si e banko drenta den problema finansiero òf kualke otro índole; tin un garantia ku e sènnan ta protehá. Na Kòrsou ainda nos no tin e sistema na vigor . Minister a primintí i sigurá Parlamento ku e sistema aki lo bini. Pa esaki sosodé mester traha  un lei pa regla esaki  riba término korto. Sinembargo te ainda nos no a risibí e lei aki pa tratamentu den Parlamento

 

Hasiendo uso di artíkulo 96 pa asina mi ke hasi Minister di Finansa, sr Silvania, e siguiente preguntanan:

 

1. Kon leu Minister ta ku e lei ku ta regla e garantia riba depósito di siudadanonan serka kualke instituto finansiero  na Kòrsou?

 

2. Minister lo por splika e benefisiosonan pa pueblo di Kòrsou na momento ku e sistema aki keda introdusí i e peliger pa pueblo tanten ku e sistema aki no wòrdu introdusi?

 

3. Minister por duna un fecha konkreto kaba?

 

 

 

4. Miéntras tantu ku e lei aki no ta na vigor, Minister tin un reda sosial ku ta protehá siudadanonan ku tin na sèn depositá den institutonan finansiero aki na Kòrsou?

 

5. E sistema aki lo ta aplikabel tambe riba fondonan di penshun di siudadano?

 

E pregunta aki nos ta hasié mirando kiko ta pasando na e momentonan aki  pa loke ta trata  klientenan di Ennia i e inseguridat di nan penshun ku nan a paga p’e ku sodó di nan frenta.

 

En espera di un pronto reakshon,

 

Danki di antemano,

 

Zita Jesus Leito MBA

Miembro di Parlamento, Partido Alternativa Real