Deliberashon ku minister Cooper tokante Curaçao Data & Television

Presidente di Parlamento

Sra. America-Francisca

Wilheminaplein 4

Presente

 

Kòrsou, 6 di yüni 2023

 

Tópiko: Deliberashon ku minister Cooper tokante Curaçao Data & Television

 

Apresiabel sra. Presidente America-Francisca,

 

Den luna di mei 2022 minister Cooper a nombra sr. Hernandez, komo direktor interino di e kompania di gobièrnu Curaçao Data & Television, bou di kua Telecuraçao tambe ta kai. E nombramentu di sr. Hernandez den prensa a lanta bastante konmoshon, teniendo kuenta ku e konseho negativo di SBTNO.

 

Minister Cooper durante entrevistanan a indiká ku el a nombra sr. Hernandez pa hasi investigashon di posibel kasonan di ‘toko den toko’ i posibel kasonan di froude ku fondonan di e kompania. Den afan pa yega na fondo di loke ta pasando a pone 3 persona riba ‘ non-actief’ i a inisiá un investigashon por medio di e kompania Forensic Services Caribbean, pa un supuesto montante di 10.000 Ang. pa luna. Segun deklarashon di minister Cooper na un radio emisora, 5 di yüni 2023, e investigashon aki ainda no a keda entregá na su persona.

 

Por komprondé e sorpresa di suskritonan, na momento ku nan a tuma nota ku sr. Hernandez su kontrato di un aña, no lo keda prolongá. Lokual ta remarkabel teniendo kuenta ku e investigashon forénsiko inisiá dor di su persona no a finalisá ainda, ademas e situashon finansiero di Telecuraçao ta sigur di atenshon ainda. Na aña 2020 Gobièrnu di Kòrsou a asumí e responsabilidat di Telecuracao i Dataplanet kontra konseho di SBTNO, pa asina garantisá ku lo tuma e pasonan korekto pa ku e kompania i su trahadónan. Ta imperativo ku Parlamento ta vigilá ku Gobièrnu ta hasi tur kos na su alkanse na bienestar di Curaçao Data & Television.

 

Den kuadro di e informashon ku frakshon di PAR a risibí i si tene kuenta ku e puntonan ariba menshoná, suskritonan ta haña nesesario pa hasi e petishon na presidente di Parlamento pa  yama un reunion di karakter di urgensia ku minister Cooper, a base artíkulo 64 di Reglamento di Órden, pa deliberá riba e maneho di Curaçao Data & Television.

 

Danki di antemano,

 

Miembronan di Parlamento, Partido Alternativa Real

 

Ana Maria Pauletta                                                     Quincy Girigorie

Zita Jesus Leito MBA                                                   Steven Croes