Den un karta pa gobièrnu Parlamentario Ishahier Monte ta proponé insentivo pa un Kòrsou mas limpi

Parlamentario Ishahier Monte di frakshon MFK den parlamento, hasiendo uso di su derechi di hasi pregunta, ta pidi klaridat na gobiernu di Kòrsou tokante e suma di aproksimadamente XCG 8 mion ku gobièrnu a indiká ku a reservá pa limpiesa na Kòrsou.

Segun sr. Monte, limpiesa di nos isla ta un tema importante ku ta afektá salubridat públiko, kalidat di bida, medio ambiente i tambe nos imágen komo destinashon turístiko. MFK ta sostené e prinsipio ku tantu siudadanonan komo gobièrnu tin un responsabilidat kompartí i integral pa mantené Kòrsou limpi.

Den su preguntanan na minister, sr Monte ta pidi klaridat tokante di kon e fondo di XCG 8 mion lo wòrdu invertí. Entre otro, e kier sa si e fondo ta destiná pa un proyekto spesífiko òf pa un programa mas amplio di mantenshon, ku si lo tin un proseso transparente di selekshon di kontratistanan pa ehekutá e trabounan, i den kua bario, kaya, playa, mondi i otro lugánan públiko e aktividatnan di limpiesa lo tuma lugá.

Ademas, sr. Monte ta presentá un idea inovador pa stimulá partisipashon di pueblo den mantenshon di un Kòrsou limpi. E proposishon di sr. Monte ta pa evaluá un sistema di insentivo kaminda siudadanonan por risibí un kompensashon pa sushi ku nan entregá boluntariamente na landfill òf sentronan di kolekshon outorisá. Segun sr. Monte, un sistema asina por kontribuí na redukshon di tiramentu di sushi ilegal den bario nan, mondi i lugánan públiko.

Den e mesun rosea, sr. Monte kier sa tambe si gobièrnu lo por konsiderá pa destiná un parti di e rekursonan disponibel pa inisiativa nan ku por benefisiá direktamente famianan i personanan ku ta den situashon vulnerabel i di nesesidat agudo.

“Limpiesa ta importante, pero e invershon públiko mester ta transparente, efektivo i e mester produsí benefisio real pa pueblo. Nos kier sigurá ku kada florin invertí ta kontribuí tantu na un Kòrsou mas limpi komo na un Kòrsou mas fuerte sosialmente,” asina parlamentario Ishahier Monte ta deklará.

Sr. Monte ta spera ku gobiernu lo duna kontesta kla i detayá riba e preguntanan presentá, pa pueblo por haña un mihó bista riba kon e fondo públiko aki lo wòrdu utilisá na su benefisio.

Ishahier Monte

Parlamentario pa

Frakshon di MFK