Presidente di Parlamento di Kòrsou presente na Merka pa presensiá momentu históriko i apoyá e ekipo nashonal di futbòl di Kòrsou na Kopa Mundial 2026.
Presidente di Parlamento di Kòrsou presente na Merka pa presensiá momentu históriko i apoyá e ekipo nashonal di futbòl di Kòrsou na Kopa Mundial 2026.
HOUSTON, Djaluna 15 di yüni 2026. Presidente di Parlamento di Kòrsou, sr. Fergino Brownbill, ta na Merka den kuadro di e debut di e ekipo nashonal di futbòl di Kòrsou den Kopa Mundial 2026.
Riba 18 di novèmber 2025, nos ekipo nashonal di futbòl a hunga su último partido di kualifikashon, ku un empate kontra e tim di Jamaica riba teritorio hamaikino, a lográ kualifiká pa promé bes den Kòrsou su historia pa un Kopa Mundial. Ku e logro inmenso aki, Kòrsou mesora a bira e Nashon ku un poblashon mas chikí na mundu ku ta partisipá na Kopa Mundial i sobra ta historia. A lanta un euforia total kaminda nos komunidat tantu nashonal komo internashonal ta sumamente orguyoso di ta “Yu di Kòrsou” i nos tur por a mira kiko e “Ola Blou” a hasi i ta hasiendo rònt mundu. Den e kuadro aki Parlamento di Kòrsou, komo e órgano demokrátiko mas haltu den nos pais ku ta basá riba un estado di derecho ku un demokrasia parlamentario, a tuma e desishon preliminar (ku despues lo ser ratifiká den un reunion di Parlamento) ku Presidente di Parlamento ta bai representá Parlamento i konsekuentemente pueblo di Kòrsou na e promé weganan di grupo di nos ekipo nashonal di futbòl ku tumando lugá na Merka.
Djadumingu, 14 di yüni 2026, parti mainta promé ku e partido entre Kòrsou i Alemania, tabatin e seremonia kaminda Kòrsou a risibí ofisialmente e rekonosementu, pa medio di un sertifikado di Guiness World Records, komo e nashon mas chikí na mundu ku ta kualifiká pa Kopa Mundial. E seremonia aki a ser organisá pa CINEX konhunto ku Gobièrnu di Kòrsou i a tuma lugá na Hotèl Zaza na Houston. Presidente di Parlamento, sr. Fergino Brownbill, tabata presente akinan huntu ku entre otro dignatario i mandatarionan manera Su Ekselensia Gobernador di Kòrsou, sr. Mauritsz de Kort, Promé Minister di Kòrsou, sr. Gilmar Pisas, Harris County Judge di Texas, sra. Lira Hidalgo, Minister di Enseñansa, Siensia, Kultura i Deporte, sr. Sithree van Heydoorn, Minister di Desaroyo Ekonómiko, sr. Roderick Middelhof, Minister di Tráfiko, Transporte i Planifikashon Urbano, sr. Charles Cooper, representante di Reino Ulandes, Kònsùl General di Reino Ulandes na Miami, Estádos Unídos, sra. Lisette Den Breems i Presidente di Federashon di Futbòl Kòrsou, sr. Gilbert Martina.
E mainta a kuminsa kargá ku hopi emoshon kaminda por a skucha palabranan di bon biní, éksito i aliento di parti sra. Lira Hidalgo i siguí pa diskursonan di Minister Van Heydoorn i Promé Minister Pisas, ku a duna un spich históriko. E liña kòrá di e diskursonan tabata kurashi, resiliensia i soña grandi semper, kualnan ta reflehá bèk den e echo ku Kòrsou a logra yega su promé Kopa Mundial despues di un soño, vishon i añanan di trabou duru i inkansabel. Finalmente representante di Guiness World Records, sra. Hannah Ortman, a hasi entrega di e sertifikado ofisial na sr. Gilbert Martina, pa e nashon mas chikí na mundu ku a kualifiká pa Kopa Mundial di futbòl.
12’or di mèrdia, ora lokal, tabata “E DIA” i “E MOMENTU” kaminda e ekipo di Kòrsou mes a subi vèlt di bala na NRG Stadium Houston i hasi historia pa semper. Kòrsou tabata bon representá den stadion i nos hendenan a laga nan bos resoná pa mundu mira kon orguyoso i grandi na kurason e pais aki ta. Finalmente e momentu a yega ku nos bandera a habri grandi riba vèlt i nos himno a keda toká. Tur hende presente den e stadion i na kas a biba momentunan hopi emoshonal i di legria pa nos Pais ku tantu nos ta stima. Nos ekipo a lucha fuerte kontra Alemania i apesar di e derota, nos a bolbe marka historia ku nos promé gol di mundial, anotá pa Livano Comenencia, pa asina empatá e partido kontra di un ‘kuater biaha kampion mundial’ i usando un di e mihó porteronan aktual na mundu, Manuel Neuer.
Parlamento di Kòrsou ta sumamente orguyoso di nos ekipo nashonal di futbòl i ta yama hinter e tim danki pa a saka kara di pais Kòrsou en Grande. Nos a keda poné riba mapa mundial na un manera ku no por deskribí ku palabra i mesora hasi un propaganda impagabel pa Kòrsou. Presidente di Parlamento di Kòrsou, sr. Fergino Brownbill, na nòmber di Parlamento ta deseá e ekipo tur klase di éksito i forsa den e weganan benidero. Nos a gana KABA!!
Presidente di Parlamento, sr. Fergino Brownbill, ta keda kompañá durante di e biahe aki pa e grefir-supstituto di Parlamento, sr. Gioke Maduro.
