Projekto: 1 Brasa 3 Bida
Projekto: 1 Brasa 3 Bida
Nos tei aki awe pa papia tokante un projekto “1 Brasa 3 Bida” ku tin komo meta pa recruit donantenan di sanger nobo i garantisá un suministro stabil i kontinuo di sanger pa Bloedbank Curaçao. Nos ta kere ku e proyekto aki lo no solamente krea konsientisashon den komunidat tokante e importansia di donashon di sanger, pero tambe lo yuda salba bida.
Nos proyekto “1 Brasa 3 Bida” ta un kolaborashon entre JCI Willemstad i Stichting Rode Kruis Bloedbank Curaçao. Hunto, nos ta traha duru pa promové donashon di sanger i asina sigura ku Bloedbank tin sufisiente donante pa e nesesidat di pashentnan na Kòrsou.
Pa yega na e komunidat i krea konsientisashon, nos ta bay hasi uso di diferente plataforma manera retnan sosial i tambe podcasts. Pero tambe nos tin plania pa ta fisikamente presente na diferente luga i establesimentunan den futuro, pa tin kontakto direktamente ku nos komunidat. Ku esaki nos ta spera di por konektá ku mas hende i stimulá nan pa bira dunado di sanger.
Nos ta orguyoso di konta ku sosten di diferente persona konosí den komunidat ku a aksepta pa forma parti di e kousa aki i ta funshoná komo “Ambassadors” pa nos proyekto 1 brasa 3 bida. Aktualmente, tin kuater persona ku lo yuda nos pa promové donashon di sanger i inspirá otro pa uni nan mes na e kousa aki. Michel Jourdain, Nicole Maduro, Angelique Klooster y Naphtaly Leito
Además, nos ta desea di ekspresá nos gratitud na Advent Distributor N.V. i Farminpex N.V., dos empresa ku no a duda pa traha huntu ku nos for di e momento ku nan a tende tokante e projekto.
JCI Willemstad ke ekstendé un invitashon na komunidat di Kòrsou pa e prome aktividad di e projekto ”1 Brasa 3 Bida”. Nos ta enkurasha kada un di boso pa e donor drive , ku lo tuma lugá dia 21 i 22 di yüni 2023 for di 12 merdia pa 6:30 atardi. E evento aki lo brindá un oportunidat pa bo registrá i kuminsá e proseso pa bira un dunado di sanger.
No lubidá, dor di duná sanger, bo tin e poder pa hasi un diferensia grandi den bida di otro. Hunto, nos por sigura un suministro stabil i kontinuo di sanger pa Bloedbank Curaçao i hasi un impakto positivo den bida di hopi hende ku ta den nesesisad.