Nos Pais Television ta marka historia un biaha mas ku derechi eksklusivo di Transmishon Weganan Centroamericano i di Karibe San Salvador 2023
Nos Pais Television ta marka historia un biaha mas ku derechi eksklusivo di Transmishon
Weganan Centroamericano i di Karibe San Salvador 2023
Willemstad— Kanal di televishon Nos Pais i su direktora Mavis Albertina, awe tardi durante un rueda
di prensa huntu ku FDOK, a anunsiá otro transmishon monumental i eksklusivo di Weganan Centro
Americano y del Caribe San Salvador 2023, kaminda Kòrsou ta partisipa den seis kategoria:
atletismo, beisbòl, sòftbòl, arkeria, tènis i natashon.
Te ku 2011 nos a partisipa bou di bandera di Antia Hulandes i na 2018 Kòrsou a partisipa pa promé
biaha na Barranquilla, Colombia komo pais outónomo.
Nos Pais Television su meta ta pa promové Nation Building i tur kaminda ku nos bandera ta ser
representa, nos tei. Ta p’esei ofisialmente a atkerí e derechinan eksklusivo pa transmishon di tur
wega durante e torneo di beisbòl i sòftbòl di 23 di yüni te ku 8 di yüli próksimo. Aparte di e weganan
ariba menshoná lo kompartí highlights di e otro disiplinanan kaminda Kòrsou ta partisipa manera
entre otro arkeria, atletismo, tènis i natashon i demas disiplinanan naturalmente.
Weganan Centro Americano y del Caribe ta tuma luga kada 4 aña i ta ekiponan ku klasifiká so por
tuma parti. Un total di 36 pais lo partisipa e aña aki den 53 disiplina durante di e di 24 edishon di e
weganan. Pa loke ta trata beisbòl i sòftbòl, kada ekipo ta hunga un total di 7 wega preliminar
durante e promé rònt i ku bon resultado lo hunga rònt nan di ‘play off’. Ta trata aki di mas ku 60
wega en total. Nos lo kompetí kontra selekshon di Mexico, Nicaragua, Cuba, Puerto Rico, El Salvador,
Venezuela i Repúblika Dominikana. E ekipo profeshonal di komentarista i naradonan ta kla prepará
un biaha mas pa brinda e televidente tur informashon al kaso i relevante, konsistiendo di Alexander
Makaja, Gino Valeriaan, Clarck Zalm, Jair Quand i Rafelito Jozefa.
Nos Pais Television, den un logro históriko i eksklusivo ta trese tur 60 wega durante Centro
Americano y del Caribe, te den e kalor di bo kas. E posibilidat a bira un realidat na momento ku
direktora di e planta, Mavis Albertina a firma ku representante di Centro Caribe Sports ku ta organisá
e kampionato i tin tur derecho di transmishon.
Nos Pais Television alabes ta agradesí su patrosinadónan di e proyekto históriko aki, ku ya kaba a
konfirmá nan sosten manera entre otro Maduro & Curiel’s Bank, Ministerio di Kultura i Deporte,
Aqualectra, Ofisina di Turismo, Korpodeko, Curoil, Curaçao Airport Partners, Refineria di Korsou,
Bureau Telecommunicatie- en Post, CINEX, Curaçao Port Services i Fundashon Wega di Number
Kòrsou. Finalmente un pabien i danki ta bai pa e pueblo di Kòrsou ku e gran logro aki.
Athunto e wèpsait nan pa mas informashon: https://sansalvador2023.com/ &
https://centrocaribesports.org/