GOBIÈRNU TA FIRMA AKUERDO KU CAAM-HP

 

 

** Riba e potrètnan athunto por tuma nota di e momentu ku ministernan ta firma e akuerdo.

WILLEMSTAD – Minister di Enseñansa, Siensia, Kultura i Deporte i Minister di Salubridat Públiko, Medio Ambiente i Naturalesa den representashon di Gobièrnu di Kòrsou resientemente a firma un Memorandum of Understanding ku CAAM-HP (Caribbean Accreditation Authority for Education in Medicine and Other Health Professionals). Esaki ta permití CAAM-HP pa akreditá universidatnan internashonal establesé na Kòrsou.

CAAM-HP ta internashonalmente rekonosé pa World Federation of Medical Education komo un organisashon di kalidat haltu. Universidatnan ku keda akreditá dor di CAAM-HP òf otro organisashonnan, ta kumpli ku e kondishon nobo ku Estados Unidos a pone pa 1 yanüari 2024: esta ku tur universidat mester ta akreditá pa nan studiantenan por sigui studia na Estádos Unidos. Kòrsou tambe a pone na 2019 e eksigensia ku universidatnan médiko ku establesé nan mes na Kòrsou mester laga akreditá nan mes dor di un instansia internashonalmente rekonosé. Banda di CAAM-HP tin dos otro organisashon mas internashonal ku tin akuerdo kuné.

E firmamentu aki ta relashoná ku Avalon University Medical School, establesé na WTC. Minister sr. Sithree van Heydoorn i Minister sr. Javier Silvania a firma e akuerdo aki den presensia di e Direktivanan i dignatarionan di e Universidat den presensia di Sekretario General di MESKD sra. Susan Larmonie-van Heydoorn, Inspektor-General di Salubridat sr. Sirving Keli.

Ku esaki Gobièrnu ta brinda mas posibilidat pa profeshonalismo internashonal den e área edukashonal di salubridat.

***********