Tur kos ta ‘ready’ pa Prince Royce, Elvis Crespo, Kassav i UB40 feat. Ali Campbell
Tur kos ta ‘ready’ pa Prince Royce, Elvis Crespo, Kassav i UB40 feat. Ali Campbell
A duna ‘update’ riba Hak’e Curaçao Summer Festival
WILLEMSTAD: Ayera atardi organisashon di Hak’e a topa ku prensa pa duna un ‘update’ relashoná ku e grandioso Curaçao Summer Festival. Manchi Harms a elaborá riba e artistanan ku lo ta yegando Kòrsou for di dia 27 di yüni próksimo. “Tur hende ta pendiente pa Hak’e Curaçao Summer Festival; nos ta sumamente kontentu ku e akohida. Elvis Crespo lo ta yegando for di dia 27 di yüni, miéntras ku Prince Royce i UB 40 kompletu ta yegando dia 29 di yüni i finalmente Kassav dia 30 di yüni. Na e momentunan aki e karchinan ‘fan ticket’ a kaba, i e karchinan den tanda 2 tambe. Karchinan entrada general awor ta 125 florin. Mester bisa ku karchinan den tur sekshon ta bayendo rápido i por sinti e entusiasmo di parti di públiko na Kòrsou, tambe di Aruba, Boneiru, Colombia i Sürnam”.
Merkadeo internashonal ku a wòrdu hasi konhuntamente ku CTB a duna resultado fantástiko i por spera un gran kantidat di bishitante for di den region. For di Aruba, Boneiru i St. Maarten lo tin buelonan èkstra i esaki sigur lo hasi ku Kòrsou por spera un gran kantidat di bishitante e fin di siman di e festival. Tambe, a duna un splikashon amplio riba e sitionan di parker i e ruta ku ‘bus’ lo kore pa hiba fanátikonan di e sitio di parker pa e área di konsierto. Mas aleu, e organisashon a komentá ku nan lo enfoká únikamente riba e anochinan di konsierto. Bisando esaki; lo no organisá e ‘food festival’ e aña aki mas. Ta invitá pueblo di Kòrsou pa selebrá Dia di Bandera den e barionan rònt Kòrsou. Komo organisashon ta sostené e barionan ku nan evento i ta deseá pa komunidat sali kas i disfrutá.
Dia 30 di yüni, i 1 di yüli próksimo tur hende lo disfrutá di Prince Royce, Elvis Crespo, UB40 ku Ali Campbell i Kassav. Faltando 10 dia, por hasi menshon ku ya kaba a kuminsá konstrukshon di e área di konsierto. Hak’e Curaçao Summer Festival ta primintí di bira un espektákulo total ekipá ku su foodcourt i funzone, su balkon pa VIP i e área di mas grandi pa e públiko ku masalmente lo bishitá Curaçao Airport Venue! Por kumpra karchi na Van den Tweel Supermarkt, Vanddis, Mensings Caminada i Bugs Bunny of riba www.hakecuracao.com. Ta rekomendá e pakete pa tur dos dia, semper esaki lo ta mas atraktivo pa e fanátiko. Pa informashon di VIP sekshon Balcony òf Platinum por tuma kontakto na: +5999-5209700.