Minister Shalten Hato JUSTITIEEL VIERPARTIJEN OVERLEG (DIA 2)

Awe a tuma lugá e parti Ministerial di e reunion bi-anual di e kadena hudisial di Reino Hulandes.
Den e di dos JVO pa aña 2023 a yega na algun palabrashon konkreto kon pa sigui traha huntu pa mehorá i empoderá e kadena hudisial.
Durante e edishon aki di JVO a toka diferente tema ku ta di sumo importansia pa fortifiká e kadena hudisial manera un resumen di e trabounan di lastu lunanan di wardakosta, tematikanan di imigrashon i indokumentadonan ku ta pone un preshon grandi riba nos sistema hudisial i penitensiario.
Alabes situashonnan aktual di detenidonan ku meresé kuido spesial manera TBS i PIJ ta indiká ku nos tin un kaminda largu pa bai ainda pa duna kuido adekua. Fortunadamente nos na Kòrsou tin un departamentu di FOBA den SDKK riba kual nos por ta orguyoso pero alabes mester sigui konstruí pa duna un mihó servisio na klientenan di SDKK.
Den kuadro di esaki Hulanda ta bai asistí Aruba pa krea un base di kuido forensiko riba kual demas paisnan por midi nan mes pa asina evitá ku tin diskrepansia grandi den kuido den e paisnan den Karibe ku ta parti Reino. Punto di salida di e base di kuido forensiko aki ta pa den kolaborashon estrecho e paisnan traha huntu pa garantisá seguridat di sosiedat i tambe e detenido ku meresé kuido mas avansá.
Tambe Minister a risibí den e edishon di JVO aki un presentashon di Ministerio Publiko regardando e estudio pa fiskalnan nobo, yòn, i lokal pa fortifiká nos aparato hudisial.
Por último e Ministernan a amplia den JVO tokante kon entidatnan den e kadena hudisial mester wòrdu fortifiká pa kombatí kriminalidat i pa tin un mihó kolaborashon den e paisnan den Reino Hulandes