INTER WILLEMSTAD KAMPION DI  KAMPIONATO FEMENINO 22-23 PA KATEGORIA U-15!

 INTER WILLEMSTAD KAMPION DI  KAMPIONATO FEMENINO 22-23

PA KATEGORIA U-15!

 

 

Djabièrnè atardi dilanti un bon públiko Inter Willemstad a titulá kampion despues di a gana Centro Juve ku skor di 1-0. Asina e promé kategoria di Kampionato Femenino 22-23, kategoria

U-15, a mira su gran final den Stadion Rignaal ‘Jean’ Francisca.

E públiko presente a disfrutá di un partido bon bringá pa ámbos ekipo ku a sa di batayá i duna tur ku tin pa bai ku e título máksimo. Xiarleahmay Martis Nocento a anotá e úniko gol di e partido aki ku a hiba Inter Willemstad na e viktoria i asina titulá kampion di Kampionato Femenino

22-23 kategoria U-15.

Komishon Femenino ta gradisí tur hungadó, dirigentenan, mayornan, rèfrinan i tur ku di un manera òf otro a kontribuí pa Kampionato Femenino 22-23 kategoria U-15 ta un éksito.

Kategoria U-17 ku Senior pronto lo konosé nan ekiponan kampion i supkampion ora e partidonan final ku ta pendiente tuma lugá, na momentu ku e resultadonan di algun protesta bira konosí. Tiki tiki pero sigur e temporada aki tambe lo yega na su final p’asina nos damanan kuminsá prepará pa e próksimo temporada.

 

Resultado partido final;

23 yüni 2023
Stadion	Kategoria	Tim 1	v/s	Tim 2	U-15
RJF	Wega final U15	Centro Juve	v/s	Inter Willemstad	0-1

 

Komishon Femenino ta felisitá e ekipo kampion Inter Willemstad i tambe e ekipo supkampion, Centro Juve pa kategoria U-15 di Kampionato Femenino 22-23.

 

26 yüni 2023