IR. DWIGNO PURIEL NOMBRÁ KOMO ‘KWARTIERMAKER CYBER SECURITY’ PA KÒRSOU
MINISTERIO KONSERNÍ TRÁFIKO, TRANSPORTE I PLANIFIKASHON URBANO
IR. DWIGNO PURIEL NOMBRÁ KOMO ‘KWARTIERMAKER CYBER SECURITY’ PA KÒRSOU
PUBLIKÁ RIBA 03 YÜLI 2023
Willemstad – Resientemente, Sr. Dwigno Puriel, Sekretario General di Ministerio di Tráfiko, Transporte i Planifikashon Urbano (VVRP) a keda ofisialmente nombrá dor di Gobièrnu di Kòrsou komo ‘Kwartiermaker Cyber Security’ pa Kòrsou. Esaki ta enserá ku sr. Puriel lo ta enkargá pa hasi Kòrsou komo pais den su totalidat mas resiliente riba e tereno di seguridat sibernétiko.
E tareanan komo ‘kwartiermaker’ ta entre otro:
• Lanta un National Cybersecurity Task Force (NCTF)
• Konsipiá funshonnan pa e bestür di e NCTF
• Bini ku proposishon pa miembronan di e bestür diario pa e NCTF
• Konsipiá un struktura di kompensashon pa e bestür
• Institusionalisá e NCTF
• Konsipiá e forma di traha i tareanan di e NCTF
• Laga ehekutá analisis di ‘stakeholders’ riba tereno sibernétiko
• Aserká ‘stakeholders’ komo representantenan di nan sektor
• Traha un plan di akshon pa 2024 pa e NCTF
• Sostené SOAB den desaroyá un strategia nashonal sibernétiko
• Palabrá ku e grupo di konsulta sibernétiko i ministerionan di gobièrnu
• Lanta un CERT pa Kòrsou
Tantu internashonalmente, komo den Reino Hulandes i aki na Kòrsou, seguridat sibernétiko ta birando dia pa dia mas importante. Nos ta depende riba diferente sistema digital pa nos bida diario. Ta importante pa esakinan ta seif pa por salbaguaria konsistensia.
Minister Charles Cooper ta felisitá Sr. Puriel ku e nombramentu aki i ta dese’é éksito ku ehekushon di e trabounan. Ta importante pa menshoná ku e nombramentu komo ‘kwartiermaker’ lo ta pa 1 aña.