Minister Javier Silvania: Presunto robo di sigarianan konfiská

Presunto robo di sigarianan konfiská

Den medionan sosial i den prensa ya a sali anunsio tokante di sigarianan konfiská ku a disparsé for di un depósito den e edifisio di Duana na Handelskade Punda.

E sigarianan ku tabata konfiská a keda temporalmente wardá den un depósito asigná sperando pa wòrdu destruí. E sigarianan sospechá di a wòrdu hòrta tabata forma parti di un kantidat mas grandi ku a wòrdu konfiská dor di Duana durante di inspekshonnan pa falta di e stampianan di impuesto legal preskribí.

Durante di redistribushon di lugá di trabou den e edifisio di Duana na Handelskade, a asigná un depósito nobo pa warda produktonan konfiská na desèmber 2022. Den e mesun depósito aki ta warda tambe material di ofisina di Duana.

E presunto robo aki a wòrdu konstatá dia 29 di mei último dor di un ofisial di Duana ku tabata na warda ora ku el a drenta e depósito. E insidente a wòrdu raportá mesora na e kabesante di tim konserní. A krea un relato, un reportahe i un reportahe detayá di e insidente aki riba 28, 29 i 30 di yüni respektivamente.

E relato i e reportahe ta indiká ku 22 pakete di Marlboro Ice Blast ta pèrdí i pues probablemente a wòrdu hòrtá. Pero e kantidat aki ta wòrdu koregí despues den e rapòrt detayá. Un análisis mas despues di e dokumentonan disponibel ta mustra ku 544 sigaria a disparsé for di un stòk di 2.054 sigaria konfiská, ku ta konsistí di 23 pakete di Marlboro Ice Blast, 3 pakete di Marlboro Gold i 24 sigaria lòs (6 sigaria di Marlboro lòs, 9 sigaria di L&M lòs i 9 sigaria di Camel lòs).

E resto di e sigarianan konfiská a wòrdu destruí riba 2 di yüni, i a traha un prosèsverbal di e destrukshon aki riba 28 di yüni.

A hasi un denunsia di e suseso aki. Pa benefisio di e investigashon, Duana no ta duna mas informashon ainda.