Funshonarionan di GMN ta konstatá situashon a-higiéniko den 2 loods ku ta kontené produktonan di alimento.

 

Funshonarionan di GMN ta konstatá situashon a-higiéniko den 2 loods ku ta kontené produktonan di alimento.

Willemstad – Ministerio di GMN ta partisipá ku e Departamentu di Asuntunan di Higiena Tékniko (THZ) di Servisio di Salubridat Públiko (UO G&Gz ántes GGD) huntu ku “Inspecteur Gezondheidsbescherming” di departamentu di Inspekshon, resientemente a hasi un inspekshon na dos loods kaminda ta almasená produktonan di alimento.

E kòntròlnan aki a tuma lugá bou di kordinashon di “Inspecteur Gezondheids-bescherming” enkargá ku kòntròl di produktonan di alimento. Ta trata aki di dos loods ku ta situá na Parke Industrial na Seru Loraweg. Basá riba informashon optené ku posibelmente tin produktonan kaduká den e loodsnan ku destinashon pa benta na públiko i ku esakinan lo ta almasená den un ambiente a-higiéniko, a hiba un kòntròl i inspekshon riguroso.

Loods number 1 ta destiná pa warda produktonan kosmétiko i Loods number 2 ta destiná pa warda produktonan alimentisio.

Durante e inspekshon den e promé loods, ku a tuma lugá dia 3 di yüli último, a bin konstatá algun produkto di alimento den e loods ku ta destiná pa almasená produktonan kosmétiko. Den e loods aki tabatin hopi stòf i a deskubrí tambe shushi di djaka na diferente sitio. Momentu ku a bai inspekshoná e di dos loods a haña esaki di tal manera desordená ku e funshonarionan di GMN a opta pa laga para tur trabou ku tabata tuma lugá den e loods pa e dia ei.

Siguiente dia, esta dia 4 di yüli e funshonarionan di THZ a regresá huntu ku e inspektor. Den e di dos loods a bin haña un lote di produktonan ku nan fecha di vensementu a kaduká pa algun luna kaba. E kompania a deklará ku e produktonan aki ta destiná pa nan keda destruí, dor ku nan fecha di vensementu a kaduká. Aki tambe a topa ku algu di shushi di djaka di algun tempu pasá.

Despues ku a kolektá diferente informashon i a hasi e inspekshonnan nesesario finalmente no por a konkluí ku e produktonan ku a kaduká tabata pa nan ser poné riba merkado pa keda bend’é pa konsumo humano òf pa bestia. A deskubrí shushi di djaka, pero no a mira djaka òf otro tipo di pèst den e loodsnan. A instruí e kompania pa hasi un limpiesa riguroso den e loodsnan i tambe pa envolví un kompania di pèstkòntròl.

“Inspecteur Gezondheidsbescherming” no a haña indikashon òf prueba ku e kompania ta aktua kontra reglanan preskribí di e “Warenlandsverordening”. Riba instrukshon di inspektor bou di guia di e funshonarionan di THZ dia 5 di yüni a eskoltá e kargamentu di e produktonan kaduká pa nan keda destruí na e Landfill na Malpais.

Dia 6 di yüli a bolbe bai e loodsnan pa efektuá un kòntròl di ripitishon, pero e biaha aki no a konstatá nada a-higiéniko mas.

A indiká na e doño ku e funshonarionan di GMN lo regresá dia 17 di yüli próksimo pa kòntròl di ripitishon na e loodsnan.