PROMÉ MINISTER GILMAR PISAS A REUNÍ KU DIREKTOR DI RELASHONNAN GUBERNAMENTAL DI AVIANCA.  

PROMÉ MINISTER GILMAR PISAS A REUNÍ KU DIREKTOR DI RELASHONNAN GUBERNAMENTAL DI AVIANCA.

 

Willemstad – Promé Minister sr. Gilmar Pisas, huntu ku Minister di Tráfiko, Transporte i Planifikashon Urbano  sr. Charles Cooper a reuní ku e direktor di Relashonnan Gubernamental di Avianca sra. Dra. Viviana Martín dia 7 di yüli 2023.

 

Sra. Martín ta tambe e Presidente i Gerente General di Avianca na Costa Rica.

E tabata kompañá pa sr. Omar Cardona, kende ta Manager na Avianca.

 

Durante di e reunion aki a splika e ministernan ku Avianca ta hasiendo hopi kambio efektivo ku ta bai benefisiá e kompania mes i tambe su pasaheronan.

A duna splikashon riba tur e kambio i proyektonan ku Avianca ta hasiendo i tin pendiente, e strategia nobo ku Avianca ta hibando pa baha gastu i tambe e proyektonan ku  Avianca ta deseá di bai hasi estrechamente i mas amplio ku Kòrsou.

 

A interkambiá tambe riba e diferente destinashonnan ku por bai amplia riba dje, preisnan ku lo ta hopi mas atraktivo na momentu ku ke biaha di e.o. Kòrsou-Bogota-Miami i vice versa.

Avianca tin konekshon ku masha hopi pais den Sur Amérika, Sentro Amérika, Norte Amérika i Europa.

E kompania a keda konsiderá komo e aerolínea number unu di mundo pa ku e parti di “On Time”. Esaki ta nifiká ku e aerolínea ta semper na ora!

En konekshon ku esaki i pa por mantené e bon reputashon ku nan tin di ta semper na ora, a toka e parti di e servisio ku nan ta risibí serka Imigrashon na Kòrsou, kual ta rekerí un poko di atenshon di nos banda.

Sra. Martín a duna di konosé ku nan ta hibando kombersahonnan riba esaki ku Imigrashon na Kòrsou espeshalmente pa ku e parti di atmishon i verifikashon.

 

Sra. Martín a duna di konosé tambe ku nan a hiba kombersashon ku CTB i Duana i ku nan ta pendiente un kombersashon ku Minister di Desaroyo Ekonómiko.

 

E reunion aki tabata unu hopi fruktífero i tur esnan enbolbí a sali hopi satisfecho for di e reunion aki.