KOMUNIKADO DI PRENSA 317/2023.
8 yüli 2023.

Rekomendashon pa siudadanonan ku ta bai di biahe

Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Den temporada di vakashon, tin vários siudadano ku ta skohe pa pasa e dianan liber aki, sea
den eksterior òf na hotèl òf na un weekendhuis. Di tur manera pafó di nan kas.
Ta bon pa tene kuenta ku e siguiente rekomendashonnan:

 Laga un persona di konfiansa tira bista riba bo kas i laga un number di telefòn patras
riba kua bo ta alkansabel;

 Enkargá un bon bisiña òf e persona di konfiansa pa saka pòst i korant for di bo buzon
di karta. Si korant i pòst keda oumentá den e buzon, malechornan ta pensa ku no tin
hende na kas;

 Hasi uso mas tantu posibel di lusnan pafó di kas ku ta sende outomátikamente na
momentu ku bira sukú;

 Sera tur konekshon di gas, tantu den kushina pero tambe e silindernan di gas pafó;

 Saka mas tantu aparato posibel for di koriente i laga únikamente esunnan ku no por
manera frishidèr ets.;

 Evitá di publiká bo ousensia riba plataformanan sosial. E malechor tambe por yega
na e informashon ei i por hasi mal uso di e oportunidat;

 Promé ku bo bai, kita artefaktonan for di den kurá ku por keda usá fasilmente pa
penetrá den bo kas;

 Si bo ta laga outo keda na kas, wak pa esaki ta bon di lòk, alarmá aktivá i difísil pa
saka fo’i kurá.

Nos ta spera ku lo bo disfrutá di un dushi fakansi i ku na bo regreso bo propiedat ta
intakto manera ku bo a lag’é.