Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

 

Willemstad, 10 yüli 2023

 

Tópiko: Pregunta na Minister di Asuntunan General i Promé Minister riba e desishon di gobièrnu pa invertí mas ku 4 mion florin na vèlt di Soto.

Honorabel sra. America-Francisca,

 

Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko; ‘Desishon di Gobièrnu pa invertí mas ku 4 mion florin na vèlt di Soto.‘, na Minister di Asuntunan General i Promé Minister sr Pisas.

 

Atentamente,

 

 

Steven Croes

Frakshon di PAR

 

Na: Minister di Asuntunan General i Promé Minister

Sr. Gilmar Pisas

Fort Amsterdam 17

 

Willemstad 10 yüli 2023

 

Tópiko: Desishon di gobièrnu pa invertí mas ku 4 mion florin na vèlt di Soto

 

Honorabel Sr. Pisas,

 

Suskrito a tuma nota ku gobièrnu, via di Reda Sosial, lo bai invertí 4 mion florin pa optimalisá vèlt di Soto.

 

Pa ku esaki, suskrito ta puntra Promé Minister sr Pisas, enkaresidamente pa por fabor kontesta di forma urgente e siguiente preguntanan:

 

1. Dikon a kis pa invertí mas ku 4 mion florin den 1 proyekto so?

 

Por ehèmpel, pa optimalisá vèlt di ‘Jong Holland’ ku yerba i lus a kosta 1.6 mion i vèlt di ‘Rising Trotters’ na Brievengat a kosta 1.4 mion pa pone yerba artifisial i lus. Na Banda Abou tambe tin vèltnan manera na Rio Magdalena ku tambe mester di yerba ku lus i meskos ta konta pa vèlt di Lagun. Si a usa por ehèmpel 1.4 mion na Soto, mas bario por a haña vèlt optimalisá!

 

1. Riba kiko a basa e desishon pa invertí na vèlt di Soto i tambe e montante di 4 mion florin?
2. Dikon no a kis por ehèmpel pa Tera Kora, unda kompará ku Soto, tin muchu mas tantu hende ta biba den e bario i besindario i tin vários skol nan tambe?
3. Gobièrnu a traha un ‘onderhoudsplan’ kon ta bai mantené e kompleho kostoso i grandi aki? Den kaso di si, mi ke risibí un kopia ora ta kontesta mi karta.
4. Dikon no a kis pa invertí e montante grandi aki den maneho di deporte? Por ehèmpel trese trainernan profeshonal di eksterior pa train nos atleta nan i trainernan lokal? I/òf invertí den sala/vèlt nan di deporte na nos skol nan (di fundeshi) unda tur mucha i nos talento nan ta yega den kontakto ku deporte? Gobièrnu tin relashon di supsidio ku FDOK i FDDK, tur aña ta keda kòrta serka nan, pues por a kis tambe pa hinka e sèn pa subi supsidio di e dos organisashonnan aki. Ora no tin sèn mester ta mas efektivo i pone prioridat kaminda mester.

 

Nos tur wak nos stadion nashonal Ergilio Hato falta basta mantenshon i ‘upgrading’.

1. Dikon no a kis pa usa parti di 4 mion florin pa invertí esaki den nos stadion nashonal?

 

 

Pa kolmo e 4 mion florin invershon na Soto ta e promé fase so.

1. Kuantu sèn e siguiente fase nan lo kosta?
2. Tabata tin destahe públiko pa e proyekto aki? Por fabor manda mi tur dokumento relatá ku esaki?

 

Atentamente,

 

Steven Croes
Frakshon di PAR