Minister Javier Silvania NOS TA SIGI BATI NAN KU LOGRO REKÒR NOBO DI ENTRADA DI IMPUESTO PA YÜNI

Minister Javier Silvania

NOS TA SIGI BATI NAN KU LOGRO
REKÒR NOBO DI ENTRADA DI IMPUESTO PA YÜNI
Awe Servisio di Impuesto a anunsiá e resultadonan pa luna di yüni. E entrada di impuesto ta NAf 37.8 mion mas haltu ku presupuesto (NAf 136.0 mion versus NAf 98.2 mion) i e entrada di primanan ta NAf 15.8 mion mas haltu ku loke a presupuestá (NAf 77.5 mion versus NAf 61.7 mion). Ku esaki a kibra otro rekort nobo atrobe.
Nunka e entrada den luna di yüni a yega di ta asina haltu. E kontribushon mas grandi e luna aki a wòrdu realisá pa impuesto riba ganashi (+ NAf 16.9 mion), OZB (+ NAf 7.8 mion) i impuesto riba salario (+ NAf 6.9 mion). E kontribushon di impuesto riba benta ta NAf 46.6 mion, di kua NAf 13.3 mion a wòrdu kobrá pa duana pa importashon. 97% di e entrada di impuesto riba benta ta referí na loke ta yama “obligashonnan aktual” òf mihó bisá e pago òf deklarashon di impuestonan. Den kaso di impuesto riba salario, hasta 98% di e entrada ta referí na e pago riba deklarashonnan.
Solamente un parti hopi chikitu di e entrada ta referí na pago di debe bieu. Esaki ta pone énfasis riba e naturalesa struktural di e entradanan mas haltu. E oumento di e entrada di OZB por wòrdu spliká dor di e aanslagnan pa 2023 ku ta wòrdu imponé aktualmente. E kordinashon ku ta tumando lugá entre e atministrashon di OZB di Servisio di Impuesto i e registro di Kadaster a revelá ku den e último añanan, no tur propiedat registrá tabata envolví den e kobransa di OZB. Pa e motibu aki, pa aña 2023 lo tin un kantidat mas haltu di aanslag di OZB ku lo wòrdu imponé kompará ku e añanan anterior i lo kontinuá despues tambe ku kobransa di e añanan anterior. E entrada di primanan di seguro sosial ta 24.5% mas haltu ku e presupuesto i 13.5% mas haltu ku e entrada di yüni di aña pasá.
Servisio di Impuesto ta traha duru pa mehorá su servisio i drecha su propio atministrashon i prosesonan. Esaki ta un trabou enorme ku ta tuma su tempu. E sifranan di entrada ku ta sigui subi (kontrali na loke algun hende a spera) ta mustra ku servisio di impuesto ta riba bon kaminda. E resultadonan aki ta ser reforsá ainda mas dor di e aktividatnan di kumplimentu di SBAB i Duana. E pronóstiko di e entradanan pa 2023 ta keda sin lugá na duda positivo.