REGISTRASHON PA TRANSPORTE PA SKOL AÑA ESKOLAR 2023-2024

WILLEMSTAD – Entrante djaluna 17 di yüli 2023, Lokèt di Pèmit lo kuminsá ku registrashon pa bini na remarke pa transporte pa skol pa aña eskolar 2023-2024. Por inskribí e yu(nan) ku mester hasi uso di transporte pa skol na Lokèt di Pèrmit banda di Subway Saliña.

Esnan ku ta outorisá pa registrá e yu pa transporte pa skol ta e mayor, tutor òf un fundashon. Pa hasi petishon mayor/tutor mester presentá ku e dokumentonan nesesario ku ta entre otro un karta di inskripshon firmá i ku stèmpel di e skol, sédula di e yu òf su karchi di SVB, prueba di entrada di mama i tata òf tutor, i sea buki di famia, ‘trouwboek’ òf ‘uittreksel’ di Kranshi (NAf. 10,00).

No ta posibel pa hasi petishon via di mail i tampoko WhatsApp pa aña eskolar 2023-2024. Solamente petishonnan di kua e dokumentonan ta korekto i kompleto lo wòrdu prosesá. Ta importante pa e mayor/tutor duna su email i number di telefòn pa por komuniká kuné ora e desishon ta kla.

Pa mas informashon tokante e dokumentonan nesesario por tuma kontakto ku Lokèt di Pèrmit na 433-3123 òf whatsapp 433-3127. Orarionan di ofisina ta di djaluna te ku djaweps di 8’or di mainta pa 3’or di mèrdia, i djabièrnè di 8’or di mainta pa 12’or di mèrdia. Tambe por subi loketdigital.gobiernu.cw/onderwijs/schooltransport pa un lista di chekeo kompleto di tur dokumento nesesario pa e petishon.

Tuma bon nota atrobe ku no por hasi petishon via di WhatsApp ni via di mail.