KÒRSOU A LANSA DIGITAL HUB AMERICAS, UN ESFUERSO LOKAL KU MESTER BIRA E KATALISADÓ DI DESAROYO DIGITAL PA KORSOU I KARIBE

A base di promesa di Minister Cooper na CANTO 2022

KÒRSOU A LANSA DIGITAL HUB AMERICAS, UN ESFUERSO LOKAL KU MESTER BIRA E KATALISADÓ DI DESAROYO DIGITAL PA KORSOU I KARIBE

Willemstad – 16 di yüli 2023- Djaluna 16 di yüli 2023 Kòrsou a presentá i posishoná Digital Hub Americas komo un katalisadó pa desaroyo teknólogiko digital di islanan den Karibe durante di e konferensha anual di Caribbean Association of National Telecommunication Organizations (CANTO), ku ta tuma lugá na Miami Florida.  Minister di Tráfiko, Transporte i Desaroyo Urbano Charles Cooper, durante di su intervenshon na e konferensha anual di CANTO 2022 a primintí ku Kòrsou lo traha i bini ku un proposishon ku lo tin un kontribushon supstanshal na desaroyo di Karibe den e mundu teknológiko digital moderno.  Kòrsou e aña aki a kumpli. Digital Hub Americas (DHA) ta un esfuerso kaminda tantu entidatnan gubernamental komo sektor privá di Kòrsou a uni pa trese un proposishon bou di un solo marka, esta Digital Hub Americas, pa netamente sirbi e nesesidatnan di paisnan den Karibe pa nan por avansá den e mundu teknológiko digital, afin ku nan por kosechá benefisionan ekonómiko i sosial.  Na un manera úniko Minister Cooper i Minister Cijntje di Desaroyo Ekonómiko a kolaborá den un presentashon den kua a lansa DHA na e konferensha di CANTO.

Digital Hub Americas ta un inisiativa inovativo ku e meta pa krea un kolaborashon i ret interkonektá ku ta aktivo riba e tereno digital na Kòrsou. E meta ta pa ko-krea produkto i servisionan lokal i ofresé esaki riba merkado internashonal.  E ta sirbi komo un marka ku ta unifiká esfuerso di e sektor di tal forma ku ta stimulá inovashon, ko-kreashon, transformashon digital, espíritu empresarial i desaroyo ekonómiko.

Dor di hasi esaki DHA ta posishoná Kòrsou komo un hub digital ekselente ku ta stimulá desaroyo ekonómiko, krea trabou i sostené desaroyo integral di nos sosiedat. E ta krea espasio pa un eko-sistema vibrante kaminda empresarionan i negoshinan chikí ku ta kuminsá por progresá dor di e avanse aki den ekonomia digital na Kòrsou.

Nos kombinashon úniko di un solo destinashon ku profeshonalnan ku konosementu riba nivel mundial, un Data Center Tier 4 bon konektá, nos alokashon na rant di e zona di orkan i e echo ku nos ta kai bou di e sistema hudisial Europeo ta hasi posibel pa Kòrsou tin un proposishon úniko na mundu pa medio di DHA.

 

E entidatnan ku ta na base di DHA ta Bureau Telecommunucatie en Post, Blue Nap Americas, CINEX, Kamer van Koophandel, Curaçao International Financial Center, Institute for Profesional Excellence, Curaçao Fintech i SIMIA.  E entidatnan aki a pone base pa un fundeshi riba kua lo desaroyá un pilá ekonómiko ku a keda identifiká den Kòrsou su Strategia pa Desaroyo Ekonómiko di mas aña.