MINISTER COOPER TA FORMA PARTI DI MINISTERIAL ROUNDTABLE: SUPPORT FOR ICT DEVELOPMENT & ITS PEOPLE

Willemstad – Riba djaluna 17 di yüli, Minister Charles Cooper a partisipá komo panelista na e ‘Ministerial Roundtable: Support for ICT Development & its people’. Esaki komo parti di e konferensia internashonal CANTO na Miami, Florida.

Na e okashon aki, Direktor di CANTO, sr. David Cox a guia e panèl. Huntu ku Minister Cooper, Minister Michel Chebat di Ministerio di Utilidatnan Públiko di Belize, i Sra. Denise White di Ministerio di Transformashon Digital di Trinidad & Tobago tambe a partisipá.

Durante di e panèl, Sr. Cox a menshoná ku Kòrsou su partisipashon ta awor ‘legendary’ durante CANTO 2023. Minister Cooper a sigui promové Kòrsou komo hùp digital pa Karibe, i ku nos den e region por kolaborá pa logra huntu adelanto riba e tereno sibernétiko. Di e forma aki, Karibe por kompetí ku otro partinan di mundu.

Minister Cooper a enfatisá tambe ku Kòrsou su sektor priva ta move fuertemente pa loke ta ICT, i nan ta e faktor ku ta move gobièrnu ku inisiativanan i inovashonnan. Tambe, Minister Cooper a indiká ku Kòrsou lo traha pa modernisashon di nos leinan pa por keda ‘up-to-date’ ku desaroyonan teknológiko.