Desvelo di plakat na kas di héroe di guera George Maduro
Desvelo di plakat na kas di héroe di guera George Maduro
For di 2002 Representashon di Hulanda na Willemstad ta operá for di den e edifisio na Scharlooweg 55. Lokual hopi no sa ta e historia di e kas i e habitante anterior. Danki na Simon Dijkhuizen ku a pone esaki na nos atenshon, djasabra 15 di yüli 2023 Su Ekselensia Gobernador Lucille George-Wout huntu ku Henry van der Kwast a revelá un plakat kaminda ta indiká ku esaki ta e kas kaminda George Maduro a nase. Sr. Van der Kwast ta un aktuprimu di Maduro i a representá famia Maduro.
A skohe pa 15 di yüli pasó George John Lionel Maduro a nase riba e dia aki na 1916. El a fayesé dia 8 di febrüari dor di tífùs den e kampo di konsentrashon Dachau na Alemania. A kondekorá Maduro póstumo ku Órden-Willem Militar, ‘Ridder 4e klasse’. Esaki ta e kondekorashon militar di mas haltu i e ta e úniko persona di Karibe hulandes ku a risibí e kondekorashon aki. El a risibí e kondekorashon aki pa su aktonan heroiko na 1940 ora el a guia un atake na Rijswijk. Bou di su guia a rekuperá Villa Dorrepaal, un lokashon stratégiko den Leidschendam ku tabata okupá temporalmente dor di aleman.
“Desde awor kada bishitante, kada turista i kada persona ku kana pasa aki dilanti por lesa riba e plakat ken a nase akinan. I tambe ki balor enorme e tabatin kome héroe di guera den historia di nos reino dor di su ròl den Segundo Guera Mundial,” segun Saskia de Reuver, Representante interino di Hulanda na Aruba, Kòrsou i Sint Maarten.
Michele Russel-Capriles a hiba palabra na nòmber di Museo Kultural Históriko Hudiu i e tabatin e honor di hasi un anunsio bunita. “Ku hopi orguyo mi ta anunsiá awe ‘tardi ku otro aña nos museo ta habri un ala nobo í un eksposishon, kaminda ta honra George Maduro en grande i permanentemente. Einan ta bin tres eksposishon permanente: George Maduro, Anne Frank i Kòrsou durante Segundo Guera Mundial. Tambe lo tin un programa di edukashon kompletu tokante esaki.
Despues di e parti ofisial bishitantenan por a haña un presentashon den e patio di e edifisio bou di guia di Johnny Angelica. Den e último añanan el a duna diferente presentashon tokante George Maduro, tantu aki na Kòrsou komo na Hulanda.
