KAMBIO DEN AREGLO DI PÈRMIT DI ESTABLESIMENTU (VESTIGINGSVERGUNNING)

Willemstad – Den kuadro di optimalisashon di e sistema di pèrmitnan ekonómiko na Kòrsou, Ministerio di Desaroyo Ekonómiko (MEO) a hasi un revishon di e areglo ku aktualmente ta regla otorgamentu di pèrmit di establesimentu na empresanan na Kòrsou, e asina yamá ‘Vestigingsvergunning’. Un pèrmit di establesimentu ta nesesario pa un persona por habri i operá un negoshi na Kòrsou (sea un eenmanszaak di un persona ku no ta lokal òf un N.V. / B.V.).

Un di e adaptashonnan den e areglo di pèrmit di establesimentu ta enserá, ku entrante 15 di ougùstùs próksimo ta bai saka e pèrmit di establesimentu den máksimo 5 dia di trabou despues ku e petishon a wòrdu entregá, i esaki ta kompletu kompañá pa tur e dokumentonan nesesario. Tambe empresarionan ku hasi petishon pa un pèrmit di establesimentu no ta bai tin mester di un pèrmit di gerensia, e asina yamá directievergunning, mas. E estranhero ku ke habri un kompania mester disponé si di un pèrmit di estadia bálido. E areglo di pèrmit di establesimentu a drenta na vigor na aña 1946 i a keda introdusí komo un instrumento pa protehá nos merkado lokal. Entretantu, tin diferente otro maneho i leinan ku ta sirbi pa protehá e merkado lokal pues den práktika e areglo di pèrmit di establesimentu, den su forma original, no tin ningun balor agregá mas i no ta pas den e deseo di Gobièrnu pa trese efisiensia i un trato di ‘red carpet’ pa empresarionan.

E kambio den e areglo di pèrmit di establesimentu ta bai tuma su tempu pa keda implementá den su totalidat, pero unabes esaki sosodé, e ta krea e espasio pa MEO por bini ku un maneho uniforme ku lo mester konta igual pa tur empresario na Kòrsou sin hasi distinshon den e tipo di kompania òf e lugá di nasementu di esnan na kabes di e empresa. Tambe, e kambio ta fasilitá efektividat di kòntròlnan ku ta wòrdu ehersé dor di Inspekshon Ekonómiko.

E revishon di e areglo di pèrmit di establesimentu tin komo meta pa gradualmente eliminá e lei aktual kompletamente pa asina desaroyá un maneho i lei di establesimentu muchu mas simplifiká i moderno. Minister Cijntje ta bai instalá un ‘Task Force’ ku ta bai ta enkargá ku modernisashon di e lei.

Pa un tempu kaba MEO tin atenshon pa e echo ku empresarionan ta indiká ku e proseso atministrativo pa kuminsá un empresa na Kòrsou ta largu i kompliká òf mihó bisá ta forma ‘red tape’ pa empresarionan. Komo parti di e esfuersonan pa mehorá e klima ekonómiko na Kòrsou, MEO a kuminsá un proseso pa revisá tur  lei i areglonan eksistente ku empresarionan por ta eksperensiá komo un opstákulo pa kreá kuponan di trabou i ku ta stroba nos ekonomia di floresé. E pensamentu di MEO pa kita for di ‘red tape’ i pasa pa un trato di ‘red carpet’, ta sali for di e punto di bista ku un empresario òf invershonista ku ke lanta un kompania na Kòrsou mester por hasi esaki lihé i efisiente si akaso e por ofresé un kontribushon positivo na un desaroyo ekonómiko duradero pa nos pais.

E kambionan den e areglo di pèrmit di establesimentu ta disponibel den su totalidat riba www.gobiernu.cw.

Por hasi petishon digital pa un pèrmit di establesimentu via Loketdigital.gobiernu.cw