OPORTUNIDAT PA KREA KANSION NOBO NA PAPIAMENTU DEN KUADRO DI AÑA ABOLISHON DI SKLABITUT
Mediante un komposishon nobo den tur estilo
OPORTUNIDAT PA KREA KANSION NOBO NA PAPIAMENTU
DEN KUADRO DI AÑA ABOLISHON DI SKLABITUT
WILLEMSTAD — Manera ta konosí, riba 3 di òktober próksimo, Gobièrnu di Hulanda ta bai rehabilitá Tula ofisialmente, esta rekonosé ku Tula tabata un luchadó pa libertat, igualdat i fraternidat i dun’é komo tal tur honor meresí.
Den kuadro di esaki, Asosiashon Promoshon Konsenshi Istóriko (APKI), miembro di Plataforma Sklabitut i Herensha di Sklabitut (PSHS), ta bai organisá un Festival di Kansion nobo ku ta karga e nòmber Bos di Libertat. E evento akí lo tuma lugá riba Djasabra 30 di Sèptèmber 8 or anochi na Plasa Brion.
A forma un orkesta di 46 músiko ku lo bai kompañá e diferente kantantenan ku lo partisipá na e festival akí, kaminda tur hende lo por skucha e kansionnan ku ta bai zona durante Konmemorashon Abolishon di Sklabitut 2023-2024.
Den kuadro di esaki, djaluna últimom 17 di yüli 2023, a tuma lugá un tayer, kaminda a informá esnan ku tabata presente kiko e festival ta konsistí di dje, miéntras ku e kompositornan a haña un splikashon amplio tokante sklabitut, lucha pa libertat, Tula, abolishon di sklabitut i emansipashon ku tabata na enkargo di drs. Charles do Rego.
Festival Bos di Libertat lo ta úniko den su klase, kaminda nos mes hendenan for di kompositor, kantante i areglista ta haña e oportunidat pa traha piesa nobo na Papiamentu. E ritmo ta liber, basta e ta di Kòrsou.
E kompositor ganador di e evento lo risibí un suma di Naf. 10.000, miéntras esun ku keda na di dos lugá Naf. 7.500 i na di tres lugá Naf. 5.000. Tambe organisashon di Festival Bos di Libertat ta paga e areglistanan ku partisipá na e evento un montante di Naf. 1.000 pa kada areglo. (E areglo mester ta unu kompletamente skibí pa 46 instrumento musikal i mester ta tokando konstantemente den e piesa)
Inskripshon pa e Festival akí ta habri awe djaweps 20 di yüli 2023 i ta sera djaweps 27 di yüli 2023 pa 6 pm. E inskripshon lo tuma lugá di forma digital. Bo mester yena tur dato ku organisashon ta pidi pa medio di e formulario di inskripshon, menera entre otro nòmber di kompositor, areglista i kantante. Tambe mester upload e teksto di e komposishon den words i tambe un demo di e kansion ku sea akompañamentu di piano o guitara.
E ensayonan pa e evento akí lo kuminsá djadumingu 3 di sèptèmber i lo sigui asina tur djadumingu. E último siman lo tin ensayo durante hinter e siman ei. E dos último ensayonan lo tuma lugá na Plasa Brion.
Ta formando un orkesta grandi ku lo ta bou di direkshon musikal di Maestro Nestor Albany Castro. A opta pa skohe un hende neutral pa ta na kabes di e orkesta. Di e 46 músikonan di e orkesta, 32 ta hende di Kòrsou o bibá aki na Kòrsou, miéntras 14 lo ta for di Venezuela. E orkesta ta konsistí di: 9 viol (5 primera 4 segunda), 2 viola, 2 cello, 2 kontrabas, 1 French Horn, 1 Oboe, 1 Fagot, 1 Clarinet, 3 dwarsfluit di kual 1 piccolo, 5 sax ( 2 Alto, 2 Tenor, 1 Báritòn), 4 Trombon di kual 1 Bass trombon, 4 Tròmpèt, 1 piano, 1 bass guitar, 1 guitara eléktriko, Drùms/Timbal, Konga, Perkushon Chikitu i 4 korista (dos femenino i dos maskulino).
Si bo ke partisipá na Festival Bos di Libertat i bo mester di mas informashon i di e link pa registrashon, bo mester subi e Página riba Facebook page ku ta: https://www.facebook.com/ana.abolishon.di.sklabitut kaminda por haña tur informashon relevante i hasta hasi pregunta.
Pa kalke informashon adishonal, por yama libermente señor Giovanni Atalita na +599 9 5103227 òf señor. Gilbert Bacilio na +599 9 5630358.
E evento akí lo ta unu ku ta 1 biaha so e lo tuma lugá i p’esei nos ke enkurashá tur nos kompositornan pa skibi piesa tokante e temanan ariba deskribí. Ta bon pa menshoná ku e 3 kansionnan ku lo skor mas haltu durante Festival Bos di Libertat, lo presentá djamars 3 di òktober ku e gran Orkesta akí, durante di e programa ku lo tin anochi na Parke Lucha pa Libertat, na okashon di e echo istóriko ku Gobièrnu di Hulanda ta bai rehabilitá Tula.
Kòrsou ta grandi i úniko. Ban pé!