AQUALECTRA A LOGRA RESTABLESÉ SUMINISTRO DI KORIENTE NA GRAN PARTI DI KÒRSOU

AQUALECTRA A LOGRA RESTABLESÉ SUMINISTRO DI KORIENTE NA GRAN PARTI DI KÒRSOU

Willemstad 27 di yüli 2023 – Despues di mas o ménos 5 ora di trabou intensivo, 90% di barionan a bolbe disponé di koriente pa 6:30 ‘or di anochi awe djaweps 27 di yüli. Lamentablemente, e barionan ku ta konektá riba e sub-stashòn na Parasasa ta un eksepshon. Apesar di e reto ku a presentá na e sub-stashòn na Parasasa, Aqualectra su promé enfoke tabata pa duna barionan koriente bèk mas pronto posibel. Awor ku koriente ta bèk na gran parti di Kòrsou, lo sigui ku e tramitenan nesesario pa kaba di investigá e motibu di e desperfekto konserní. Unabes ku logra solushoná esaki, por kuminsá suministrá koriente atrobe for di e sub-stashòn na Parasasa di moda ku sobrá bario konektá ku e sub-stashòn aki tambe por haña koriente.

Durante di e lunanan ku ta tras di lomba Aqualectra a bin ta traha duru pa fortifiká e ret di distribushon. A kuminsá ku e sub-stashònnan den bario pa despues sigui pa e sub-stashònnan mayó. Ta netamente dor di e trabounan aki por a evitá un ‘blackout’. E tipo di operashon pa mantenshon grandi aki no ta unikamente dependiente di kapasidat lokal pa inventarisá i remediá punto ménos fuerte. E ta dependé tambe di por ehèmpel kabel i ekiponan ku ta keda produsí riba spesifikashon di loke ku mester pa por hasi e trabou. Apesar di tur e retonan aki, Aqualectra lo sigui ku esfuerso pa fortifiká protekshon di su ret di distribushon i mehorá su servisio.

Aqualectra un biaha mas ke pidi diskulpa pa e inkumbiniensha ku e situashon por a kousa.