Boletin Klup di Dam Hubenil RAIS

“Rais Youth Draught Foundation Curaçao” 

Kòrsou, 3 di ougùstùs 2023

BOLETIN DI PRENSA

RI-ANNE RAFAELA I PATRICK OSEANA HOPI KOMPROMETE KU NAN TRAINING DI DAM NA HULANDA!

 

Resientemente 2 hoben hungadó di e wega di dam miembro di “Klup di Dam Hubenil RAIS” di Kòrsou a biaha pa Hulanda, na unda nan ta siguiendo un treinen intensivo di dam, ouspisiá pa e presidente di KNDB (Koninklijke Nederlandse Dambond / Federashon di Dam di Hulanda). Ta trata di e hobennan Ri-Anne Rafaela i Patrick Oseana. Mester bisa ku ambos hóben ta hopi motivá i komprometé ku e lèsnan ku nan ta hañando i ya por nota e progreso den nan wega. Ta danki tambe na intervenshon di señor Frans de Jonge, Presidente di KNDB ku e kolaborashon aki ku “Klup di Dam Hubenil RAIS” a bira posibel. Na Hulanda e dos hobennan ta risibiendo les di señor Zainal Palmans, kende ta un Gran Maestro di Dam di Hulanda.

 

Banda di e lèsnan ku nan ta risibí for di KNDB nan ta hungando tambe diferente wega di treinen ku otro hobennan di klup di dam ku ta biba den e área di Hoogeveen kaminda nan ta kedando. Durante un di e biahanan aki nan por a midi forsa ku e hoben Josef Zhang, kende ta e kampion den e kategoria Pupilo di aña 2022. Mester bisa ku ambos hóben a mustra nan habilidat, destresa i konosementu i a duna un bon prestashon.

 

Zomertoernooi Hogeveen Open 2023

Durante e periodo di 14 pa 19 di ougùstùs próksimo lo tin un torneo internashonal di dam hubenil ku lo keda organisá na Hoogeveen. Ya Ri-Anne Rafaela i Patrick Oseana a registrá pa partisipá na e torneo aki ku lo konta ku partisipashon di hobennan di Hulanda mes, tambe di Tsjechië i Kòrsou. Lo ta un kompetensia hopi interesante i importante ya komo diferente kampeon hubenil di Hulanda lo partisipá.

 

For di aki nos ta deseá tantu Ri-Anne komo Patrick hopi eksito ku e kompetensia.